The Definitive Guide to Living in the Capital , Cairo , Egypt

فن وثقافة

عروستي… مشروع فني لتحويل شخبطة الأطفال لحقيقة

اطفال تصميم تنفيذ رسم سعر شماعة عروسة عروستي لحاف لعبة مشروع يخال
عروستي… مشروع فني لتحويل شخبطة الأطفال لحقيقة
بواسطة
Shaymaa El Gammal

“الفن هو أكتر وسيلة ممكن يعبر بيها الطفل عن مشاعره واحتياجاته. من أول ما بيبقى لسة صغير بيشخبط بالقلم، والشخبطة دي بتكون أول خطوة بتخرّج روح الفنان اللي جواه. الفكرة بقى الكبار هيعملوا إيه بشخبطة الطفل ورسوماته؟ هيبيّنوا له إنها حاجة مهمة وليها قيمة؟ ولا هيرموا رسوماته في الباسكت؟”.. بالجمل دي بدأت المهندسة إيمان السيد محمود – مُؤسِسِة مشروع عروستي – كلامها معانا، لما سألناها عن الفكرة اللي ورا مشروعها.

“عروستي – مصنع أحلام الصغيريين” مشروع متكامل، بيتيح للأطفال الصغيرين إنهم يشوفوا رسوماتهم متنفذة على منتجات مختلفة. منها: عرايس قماش، ملابس، لحاف سرير، قطع أثاث زي الشماعات. أو وحدات الأدراج، أو أي منتج يتم الإتفاق عليه. ممكن الكبار يبعتوا رسومات الأطفال علشان تتنفذ حسب المتفق عليه. أو إن الاطفال يحضروا ورش عروستي، وينفذوا ده بنفسهم مع فريق عروستي المتخصص.

إيمان بدأت حياتها المهنية في مجال الرسوم المتحركة. وبعد فترة قررت إن “عروستي” يبقى هو مجال شغلها الرئيسي. إيمان بدأت المشروع كنشاط تطوعي في مدرسة أولادها. عن طريق إنها بتخلي الأطفال يرسموا شخصيات كارتونية من دماغهم، ويطلقوا عليها أسامي وبعدين ينفذوها. الأمهات لاحظوا إنه أولادهم متعلقين جدًا بالشخصية اللي نفذوها مع إيمان. واقترحوا عليها إنه يكون مشروع، متخصص لتنفيذ تصميميات الأطفال المرسومة. وفعلا الفكرة عجبتها وبدأت تنفذها، لحد ما الموضوع اتحول لـ “عروستي”.

كل رسمة بيبقى وراها حكاية. والشخصية اللي بيبتكرها الطفل، بتبقى مهمة بالنسباله. وبيحس إن التصميم حتة منه ويخصه. الشخصية دي ممكن تكون صديق خيالي، ممكن Avatar هو صممه بنفسه في لعبة بيلعبها، أو شخصية خيالية مامته بتحكيله عليها.

من أكتر الحاجات اللي بتفرق في نفسية الطفل إنه يحس بالإنجاز. ده بيحصل  لما يشوف إن رسوماته وأفكاره بتتحول لمنتج نهائي مفيد. الطفل كمان بيحس بالتقدير والاحترام، لما يلاقي أعماله الفنية بتتقدر من الكبار. ومن هنا بتيجي أهمية المشروع ده. الأطفال بعد ما بيخرج شغلهم للنور ويشوفوه، بيقولوا لإيمان إنهم عايزين يبقوا مصميين عرايس لما يكبروا.

أما عن أسعار “عروستي”، فالعرايس بتبدأ من 350 جنيه، على حسب التفاصيل اللي فيها. والتيشيرتات بتبدأ من 350 جنيه. غطاء اللحاف بـ 1200 جنيه. الشماعة الخشبية بـ 600 جنيه. مع العلم إن عروستي مش بتتعامل بالطباعة. يعني رسومات الطفل مش بتتطبع، لكن بينفذها يدويًا فريق من المتخصصين.

 ممكن تعرفوا تفاصيل أكتر عن الخدمة والورش، عن طريق التواصل مع فريق “عروستي” على صفحتهم على فيسبوك. 

مقترح