The Definitive Guide to Living in the Capital , Cairo , Egypt

“مهرجان القاهرة لموسيقى الجاز” واحد من أجمل الأحداث الفنية اللي ممكن تحضرها في القاهرة، خصوصًا لو كنت من عشاق موسيقى الجاز، وحابب تتعرف على تجارب فنية عالمية. الدورة الجديدة من المهرجان هتنطلق في القاهرة يوم 27 أكتوبر الجاري، وهتستمر لـ4 نوفمبر القادم.

وفيه 16 دولة هتشارك في فعاليات مهرجان القاهرة الدولي للجاز 2022، اللي هتتنوع عروضه ما بين حفلات موسيقية، وعروض أفلام، وبرنامج موسيقي للأطفال، وورش عمل، وأكتر.

وبيقام مهرجان الجاز تحت رعاية وزارة الثقافة المصرية، في مركز التحرير الثقافي بوسط القاهرة، وبدعم من الاتحاد الأوروبي وسفارة الولايات المتحدة الأمريكية واتحاد المراكز الثقافية القومية الأوروبية والمؤسسة الثقافية السويسرية بروهلفتسيا.

حفلات مهرجان الجاز

متوقع يشهد المهرجان حضور جماهيري كبير، خصوصًا وإنه هيتضمن عدد كبير من الحفلات المهمة، زي حفل للثنائي الليتواني فيونيكا تشيتشي ودميتري جولوفانوف، وهما من أبرز فناني الجاز في ليتوانيا.

وطبعًا هيشارك الفنان المصري العالمي يحيى خليل في المهرجان، وهو ملك موسيقى الجاز في مصر والشرق الأوسط، وهو أول من قام بمزج الموسيقى المصرية بموسيقى الجاز من وقت عودته من الولايات المتحدة.