عزبة تونس: احتفل بالفخار ومنتجات الفيوم اليدوية
Engy Azzam
كان أسبوع طويل، الإرهاق فيه شديد، مليان شغل وضغط كثير،
وكمان مليان انتخابات.. بـ تفكر تقضى الويك إند إزاى، زهقان من كل الأماكن
المعتادة اللى رحتها قبل كده، نفسك تتخلص من الطاقة السلبية وتعمل حاجة جديدة مختلفة
بس تكون مريحة وموفرة ومسلية ومكانها مش بعيد؟
“تونس” بـ تناديك وبـ توجه لك دعوة لحضور
المهرجان الأول للخزف والحرف اليدوية بدءًا من النهاردة لحد يوم 3 ديسمبر، وما تقلقش
مش هـ تحتاج طيارة علشان تحضر المهرجان، أصلها مش تونس الخضراء، لأ دى “عزبة
تونس” فى الفيوم، واحدة من النقاط السياحية المشهورة هناك، ومقصد ترفيهى
للسياح الأجانب قبل المصريين، بـ تتميز بالهدوء والمنظر الجميل اللى بـ يجمع بين
بحيرة قارون والأراضى الخضراء والجبل، ومكانها 100 كيلو متر جنوب غرب القاهرة.
وبالنسبة للمهرجان، فقراته متنوعة وجديدة بـ تبدأ من أول
الساعة 8 صباحًا، فيه عروض أفلام تسجيلية، ومعارض للوحات فنانين تشكيليين، تعليم
الأطفال إزاى يعملوا طيارات، ركوب الخيل والحمير على شاطئ بحيرة قارون، كمان فيه
فرصة شراء بضائع متنوعة ومعظمها مصنعة يدويًا زى الحصير والأخشاب والجريد، والتحف
الفرعونية الصغيرة، وإلى جانب فقرات المهرجان، ممكن تعمل رحلات سفارى، أو لو كنت
من عشاق الطبيعة ممكن تزور محمية وادى الحيتان، أما بقى لو كنت غاوى آثار هـ تلاقى
قرية ماضى الأثرية، أو تزور مركز الفيوم للفنون. ومش بس كده، لأ ممكن تتعلم إزاى
تعمل الفخار مع إيفلين بوريه فنانة سويسرية مقيمة هناك، علمت أجيال كثيرة تعمل
الفخار بطريقة مبتكرة لدرجة فيه ناس كثيرة بـ تيجي لها من خارج مصر.
المشوار مش بعيد، حوالى ساعة ونصف من ميدان الرماية،
اللى بـ يبقى فيه عربيات وأتوبيسات رايحة الفيوم، ورايحة عزبة تونس على وجه الخصوص،
أو ممكن تأخذ تاكسى من مركز المدينة نفسها، وده تكلفته 50 جنيه علشان تروح العزبة
لأن مسافتها بعيد شوية عن مركز المحافظة نفسها.
عزبة تونس مليانة فنادق وقرى سياحية بيئية كثيرة، معمولة
من الحجر نفسه أو من الخوص، ودي بـ تعطيك فرصة اكتشاف فوائد الإقامة فى مناطق مش
مبنية من الخرسانة والأسمنت المسلح. وأسعار الإقامة هناك مش غالية على الإطلاق
يعنى الليلة بـ تبدأ من أول 45 جنيه مش هـ تعدى 200 جنيه، وطبعًا بـ تختلف حسب
الغرفة مزدوجة ولا مفردة، وإن كان الحمام بداخلها ولا خارجى، وبالنسبة لأسعار الأكل
مش غالية برضه، لكن أحلى حاجة فيها أن الأكل طازج.. البط والحمام والفراخ كله طازج،
والأفطار لازم يتضمن الفطير المشلتت جنب الجبن والفول والبيض، والعسل. زيارة
الفنادق دي فى أى يوم من الأسبوع شيء عادى، لكن على الأقل تحدد هـ تأكل إيه علشان
يجهزوه قبلها بساعة، بالنسبة للويك أند لازم يبقى له حجز قبلها بفترة.
أسماء القرى هى “سوبيك” و”المندرة”،
و”زاد المسافر” ممكن توصلوا لها عن طريق الفيس بوك.. يلا الحق الويك إند
هناك وما تنساش تأخذ فخار كتذكار.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
