Omar Abd-elmaqsoud
تقريبًا كده بدأنا العد التنازلي للسنة الجديدة، وكل سنة وإحنا كلنا طبين، وطبعًا السنة اللي بتعدي بنحاول ننسى الوحش اللي فيها وبندخل على السنة الجديدة بضحكة وفرحة وبهجة، وده دايمًا اللي بنحاول ندور عليه طول السنة، بس لإن دايمًا البدايات مهمة، لازم تكون بداية كل سنة بداية مميزة، دي سنة كاملة مش يومين وهيعدوا.
يمكن علشان كده كلنا بندور على أكتر حاجة بتفرحنا نبتدي بيها السنة الجديدة، فيه اللي بيسافر، وفيه اللي بيحب يفضل في البيت، وفيه اللي بيسهر مع أصحابه في مكان بيحبه، وفيه اللي بيقرر يكون جمب نجمه المفضل (سواء مغني أو مغنية) في اللحظات اللي مش بتنسي دي، علشان تفضل معاه ذكرى مش بس للسنة الجديدة، ده كمان لسنين جاية، فتلاقي رجله خدته لحفلة لفنانه المفضل هنا أو هناك، وطبعًا في اللحظات دي الواحد فينا ما بيفكرش كتير في تمن التذكرة اللي بيكون ضعف سعرها الطبيعي و اللي أصلًا بيكون غالي.
حاولنا نعرف السر ورا أسعار تذاكر حفلات الفنانين في رأس السنة، وليه في الوقت ده بتبقى غالية بشكل كبير جدًا، هل فعلًا لإنه موسم أو سيزون زي ما بيتقال؟؟ ولا الموضوع وراه حكاية تانية؟؟ موقع (القاهرة 24) حل جزء من لغز أسعار تذاكر حفلات الفنانين في رأس السنة، وكانت الإجابة اللي جبنهالكم منه هي: الأجور اللي بياخدوها.
فعلًا أجور الفنانين في التوقيت ده من السنة بتكون فوق الطبيعية بشويتين تلاته، يعني مثًلًا وبالترتيب كده، لو بدأنا بأجر “الهضبة” عمرو دياب اللي بياخده في الحفلة الواحدة في راس السنة حوالي 200 ألف دولار، يعني حوالي 3 مليون و600 ألف جنيه مصري، واللي تعاقد فعلًا على حفلتة الجاية اللي هتكون يوم 31 ديسمبر في أبو ظبي، وهتكون معاه الفنانة مريام فارس.
تامر حسني بيستعد هو كمان لحفلته في راس السنة، واللي هتكون في فندق من فنادق شرم الشيخ، وهياخد في الحفلة دي مليون جنية، وهيكون في الحفلة دي لواحده.
محمد حماقي كمان هيبقى موجود في مصر في راس السنة، وهيعمل حفلة في فندق في التجمع الخامس مقابل 700 ألف جنية.
كمان الفنان محمد فؤاد السنة دي هيكون متواجد بحفلة من حفلات رأس السنة المميزة بـ 400 ألف جنية، وهتكون في فندق من فنادق مصر الجديدة، وهيكون معاه في الحفلة النجم الشعبي المتميز حكيم.
الفنان هاني شاكر هياخد 400 ألف جنية على حفلة رأس السنة، واللي هتكون في مركب في النيل.
في كمان نجوم شعبيين أسماؤهم بقالها فترة بتلمع وبترن في ودانا، هيعملوا حفلات السنة دي، يعني مثلًا المُطربة الشعبية بوسي هتاخد في حفلة رأس السنة الجاية اللي هتعملها في فندق في شرم الشيخ 300 ألف جنيه.
النجم مدحت صالح هيكون موجود في راس السنة في مسرح دار الأوبرا لجامعة مصر للعلوم في 6 أكتوبر يوم 31 ديسمبر، وياخود مقابل الحفلة دي حوالي 150 ألف جنية.
الفنان بهاء سلطان كمان هيثبت وجوده السنة دي بحفلة في القاهرة يوم 31 ديسمبر بأجر 150 ألف جنية.
وتقريبًا كده الزهر مالعبش مع أحمد شيبة اللي بياخد أقل أجر من بين الفنانين في حفلات راس السنة واللي هتكون حفلته في فندق في التجمع الخامس مقابل 50 ألف جنيه.
كل سنة واحنا كلنا واللي بنحبهم طيبين، وهابي نيو يير.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
