The Definitive Guide to Living in the Capital , Cairo , Egypt

أعلنت اللجنة المنظمة لمهرجان الإسكندرية السينمائي لدول البحر المتوسط، واللي بيرأسه الناقد الأمير أباظة، انطلاق الدورة 35 يوم الثلاثاء اللي جاي، وهتكون الدورة دي باسم الفنانة نبيلة عبيد، وهيستمر في المهرجان بداية من 8 ولحد 13 أكتوبر.

واختار المهرجان الدورة دي دولة أسبانيا علشان تكون ضيف شرف المهرجان، وهيتعرض فيلم الافتتاح والختام لهم، وكمان هيتم تكريم 2 من صناع السينما الأسبانية في الافتتاح، الفنان هوجوسيلفا، اللي درس الفنون المسرحية والغناء، وبدأ مشواره بالمشاركة في فيلم “حياة تريكا” وبعد كده شارك في أفلام “الملكات” 2005، و”ساندمان” 2007، و”يجب أن نتحدث” 2013، وأخيرًا “الأصم” اللي أنتج العام الحالي، بخلاف المسلسلات الكتير اللي شارك فيها بأدوار مختلفة.

وكمان هيتكرم المخرج كولدو سييرا، اللي له عدد كبير من الأفلام القصيرة، وحصل على بعضها على جوائز زي “حب الأم”، و”قطار بروجا”، وله أكثر من 20 جائزة من مهرجانات دولية، زي مهرجان أمستردام السينمائي، وأخرج 3 أفلام روائية هي “الأشجارالخلفية” و”جرنيكا” و”70 ألف دولار”.

صورة سابقة من المهرجان

وهيتعرض في المهرجان ضمن البرنامج الأسباني 4 أفلام هي، “مواجهة الرياح” إنتاج 2018، إخراج ميرتكسل كوليل أباريسيو، وقصته بتتكلم عن “مونيكا” الراقصة اللي عندها 47 سنة، وبترجع قريتها بعد 20 سنة بسبب وفاة والدها، وبسبب صعوبة الحياة هناك وصعوبة المعيشة مع والدتها لجأت إلى إنها تشتغل راقصة في قريتها.

والفيلم الثاني هيكون “الخلية المزدوجة” من إنتاج 2019، وإخراج إجناسيو مالاجون، ومدته 14 دقيقة، وبتدور أحداثه حول 2 طلاب بيدخلوا لعبة فيديو ملعونة اسمها الخلية المزدوجة، وفيها هتتحول الشقة اللي مأجرينها لسجن، والفيلم الثالث اسمه “غارق في الحب” وده من إخراج كورو بيرنابيو، ومدته 10 دقائق، وقصته بتدور في أحداث احتفال مارك ومارتا بذكراهم الشهرية بعشاء رومانسي، لكن الأحداث بتتحول بشكل غريب بسبب السوشيال ميديا.

أما الفيلم الرابع اللي هيتعرض فهو “الذكرى الأولى” وهو من إنتاج العام الحالي، ومن إخراج خيسوسبونس، وهو فيلم مدته 103 دقيقة، وبيحكي عن قصة “إيزابيل” وهي ست متزوجة من “سيبستيان”، ضابط الجيش المتقاعد اللي شخصيته صارمة وحازمة، والزوجة بتصاب بالزهايمر، وهنا بيكتشف سيبستيان أنه مايعرفش غير القليل عن زوجته.

ولمعرفة كافة التفاصيل تقدروا تشوفوا صفحة المهرجان على الفيسبوك من هنا