The Definitive Guide to Living in the Capital , Cairo , Egypt

مصدر الصورة الرئيسية من هنا.

إفيهاته وأفلامه برغم إنها أبيض وأسود إلا إنها لسه عايشة معانا، وبنعيشها وبنقولها في مواقفنا وحياتنا اليومية، وده مالوش غير تفسير واحد، وهو إنه عارف يجيب الضحكة منين، رغم همومه الكتير.

بقت ضحكته كفاية تضحكنا معاه، مع إن حياته الحقيقية بره الكاميرا مفيهاش أي ضحك، ومعظمها أزامات، بس يمكن علشان كده سميناه “أبو ضحكة جنان” .. تعالوا نتعرف أكتر على “إسماعيل ياسين” في ذكرى ميلاده الـ 107 سنة:

1- إسماعيل ياسين من مواليد 15 سبتمبر عام 1912، واتوفت والدته وهو طفل، وكان هوه الولد الوحيد، وكان أبوه تاجر ذهب وفضة في السويس، ودرس لحد سنة رابعة ابتدائي، وكانت السنة اللي فلس فيها محل أبوه، وكان سبب في دخوله السجن نتيجة لتراكم الديون عليه، فاضطر “إسماعيل” يشتغل “منادي” قدام محل لبيع القماش.

2- وصل القاهرة في الثلاثينيات واشتغل صبي قهوة في شارع محمد علي، ومن هناك اتعرف على الأسطى “نوسة” اللي كانت أشهر رقاصة للأفراح الشعبية ساعتها.

3- بعد رحلة طويلة لاكتشاف موهبته، وتعلقه بموسيقى وأغانى الموسيقار “محمد عبد الوهاب” اكتشفه صديق عمره، وشريك رحلة كفاحه الفنية المؤلف الكوميدي “أبو السعود الإبياري” اللي وصله بالفنانة “بديعة مصابني” اللي اشتغل في فرقتها “مونولوجيست” وبعدها اتنقل منها للسينما والمسرح.

4- كان بيتمنى ينافس الموسيقار “محمد عبدالوهاب” في تأليف الأغاني والألحان والغنى، لحد ما أقنعه “أبو السعود الإبياري” بإنه مبدع في فن المونولوج، وحصل.

5- نجاح إسماعيل ياسين في فن المونولوج، كان مبهر وساب علامة كبيرة في النوع ده من الفنون، وبقى رائد فيه، بعد ما تربع على عرش المونولوج لمدة 10 سنين من سنة 1935 لسنة 1945، وبقى بيؤدي المونولوج في الإذاعة مقابل 4 جنيه عن المونولوج الواحد.

6- بداية دخوله السينما كانت سنة 1939 وشارك فى أكثر من 166 فيلم في حياته، وسنة 1944 لفتت موهبته انتباه الفنان “أنور وجدي” فاستعان به في معظم أفلامه، لحد ما أنتج له فيلم من بطولته المطلقة سنة 1949 اسمه “الناصح”.

7- في السنين 52 و53 و54 قدم إسماعيل ياسين 16 فيلم في السنة الواحدة، وكان رقم مايقدرش يحققه أي فنان تاني، واشتغل مع الفنانة شادية في حوالي 23 فيلم.

8- سنة 1954 عمل فرقة بإسمه، وبمشاركة صديقه المؤلف الكبير أبو السعود الإبياري، وفضلت الفرقة دي شغالة 12 سنة، قدم فيهم 50 مسرحية بشكل شبه يومي.

9- في حياته بره الكاميرا والشهرة والإضاءة، اتجوز إسماعيل ياسين 3 مرات، وما خلفش غير ولد واحد هو المخرج الراحل “ياسين إسماعيل ياسين” من مراته الأخيرة “فوزية”.

10-  اتوفى إسماعيل ياسين في 24 مايو 1972 بسبب أزمة قلبية حادة.