The Definitive Guide to Living in the Capital , Cairo , Egypt

زي  النهارده، في 10 يوليو سنة 2015 خسرت مصر والسينما المصرية والفن المصري واحد من عمالقة السينما والفن في العالم العربي، وأول عربي وصلت شهرته لعالم هوليوود، وسبق بأداؤه في هوليوود كتير من الممثلين المصريين والعرب، النهارده بنفتكر ونخلد ذكرى “ميشيل دميتري شلهوب” أو الفنان “عمر الشريف”.

وبالمناسبة دي، حبينا نقولك 5 معلومات، ممكن تكونوا ماتعرفوهاش عن حياة الفنان “عمر الشريف”.. أيقونة السينما المصرية:

 1. احترف لعبة الـ “بريدج”:

بعد ما اتعلم “عمر الشريف” لعبة “بريدج” بالكوتشينة علشان يسلي وقته في فترات تصوير الأفلام، طور شغفه وموهبته في اللعبة، وطغت على متعته بالتمثيل، وقرر الشريف بسبب الشغف ده إنه يحترف اللعبة، لحد ما اتصنف كواحد من أفضل 50 لاعب للعبة في العالم.

وفي فترة السبعينيات، كتب “عمر الشريف” مقال لجرنال “شيكاغو تريبيون” عن اللعبة، وألف فيها وعنها كتب كتير.. وقال مرة: “بافضل لعب البريدج بدل ما أمثل فيلم سيئ”.

وقف الشريف لعب بعد كده، وقال إنه بيعتبر شغفه باللعبة وصل إلى حد الإدمان غير الصحي.

 2. كان من أشد المعجبين بنادي “هال سيتي” الإنجليزي لكرة القدم:

في الستينيات، اتشارك “الشريف” مع الممثل “توم كورتناي” في السكن، وخلال الفترة دي اتعرف على فريق “هال سيتي” أو فريق “النمور” وبقى شغوف بيه جدًا.

فضل “الشريف” من أشد مشجعين بـ “هال سيتي”، لحد ما خد درجة فخرية من جامعة مدينة “هال” سنة 2010.

وحضر “كورتناي” و”الشريف” مباراة نهائي كأس الاتحاد الإنجليزي 2014، اللي كانت في استاد “ويمبلي” علشان يتفرجوا على فريقهم المفضل ويشجعوه ضد فريق الأرسنال.

 3. استقبل عروض زواج بالآلاف:

وسامة “عمر الشريف” وذكاؤه وجاذبيته، كانت السبب في إنه استقبل 3 آلاف عرض للزواج في أسبوع افتتاح فيلمه الشهير “دكتور زيفاجو”.

الغريبة إن “الشريف” اتجوز مرة واحدة بس، من الفنانة الجميلة “فاتن حمامة” اللي وقع في غرامها بعد ما شاركها أول دور ليه في السينما المصرية.

 4- دخل “عمر الشريف” الإسلام، وغير اسمه من “ميشيل شلهوب” لـ “عمر الشريف” علشان يقدر يتجوز “فاتن حمامة” لكن للأسف انفصلوا عن بعض بعد 19 سنة.

 ​​5. واحدة من معجباته حاولت تعتدي عليه بالسلاح:

أثناء إقامة “الشريف” في فندق “دالاس” في الستينيات، اقتحمت واحدة من معجباته غرفته، وحاولت تعتدي عليه، وأمرته إنه يقلع هدومه.