The Definitive Guide to Living in the Capital , Cairo , Egypt

أيام قليلة بتفصلنا عن موعد انطلاق الدورة الثانية لمهرجان متحف المنيل للموسيقى والفنون العالمية، واللي هيكون في الفترة من 28 أكتوبر لـ 9 نوفمبر، بتنظيم من جمعية أصدقاء قصر المنيل، وتحت إشراف وزارة الآثار المصرية ووزارة الثقافة، وبمشاركة مجموعة من أفضل الموسيقيين من مختلف دول العالم، علشان يقدموا لينا معزوفات ومقاطع من الموسيقى الكلاسيكية، بالتوازي مع عرض مقتنيات متحف قصر المنيل.

هيشارك في تنظيم الدورة الثانية للمهرجان سفارات ومعاهد ثقافية أجنبية مختلفة في مصر، منها المركز الثقافي الفرنسي، والمركز الثقافي الإيطالي، والسفارة الإسبانية، والمركز الثقافي النمساوي، والسفارة التشيكية، والسفارة السلوفاكية.

مؤسس ورئيس المهرجان “عباس حلمي” أكد إن التشجيع اللي لقيته الهيئة المنظمة للمهرجان، والنجاح الكبير اللي حققته الدورة الأولى، ومنح المهرجان الموافقة على إقامته تحت رعاية اللجنة العليا للمهرجانات، كلها كانت أسباب شجعت على التوسع في الدورة الثانية، واللي أخدت في تجهيزها واستعدادتها أكتر من سنة.

الدورة الجديدة هتكون مختلفة بالتنوع الفني اللي هتقدمه، واللي هيعمل حالة مختلفة من المزج بين كلاسيكيات الموسيقي العالمية وأعمالنا التراثية المتميزة، وده لإن الهدف الأساسي للمهرجان هو الارتقاء بالذوق العام، وإعادة إحياء التراث المصري الموسيقي.

من الحاجات الجميلة اللي هيقدمها المهرجان في دورته الجديدة كمان، هي إن العائدات من الحفلات اللي هتتقدم في المهرجان هتعود على تطوير العرض المتحفي وتحديث نظام الإضاءة والحفاظ على مجموعة المقتنيات الفريدة الموجودة في قصر المنيل، وكمان ترميم بعض المعروضات بالتعاون مع إدارة المتحف وتحت إشراف وزارة الآثار.