كأنك ملك.. رحلة لمتاحف قصر عابدين العظيمة
تفاصيل متاحف قصر عابدين قصر عابدين بالقاهرة متاحف قصر عابدين
Cairo 360
عمر مراد
القاهرة فيها كتير من المتاحف التاريخية والأثرية الفريدة من نوعها، ورحلتنا النهاردة مختلفة لأنها هتكون لمتاحف “قصر عابدين” اللي جمعت بين عراقة الماضي مع لمسة جمال عصرية، وده اللي خلى لها طابع خاص ومميز عن باقي المتاحف. القصر نفسه اللي بيحتضن المتاحف قصته مختلفة، لأنه كان في الأصل مقر حكم الخديو، والنهارده هو مكان تاريخي وترفيهي.
قصر عابدين بيضم خمس متاحف، وكل متحف له حاجة بتميزه عن غيره.. تعالوا نعرف التفاصيل..
متحف الأسلحة.. من الخنجر للبندقية
في المتحف ده هتلاقي جميع الأسلحة سواء كانت قديمة أوحديثة بداية من الخنجر والسيف لغاية البندقية، وكمان جواه العديد من البدل العسكرية لجنود مصرعلى مرالتاريخ، كل تفصيلة جوة متحف الأسلحة هتبهركم، حاولوا تروحوا واستمتعوا بيه.
متحف الفضيات.. هنا أجمل المعادن!
بعد جولتك في متحف الأسلحة واللي أكيد قدر يشدك بعظمته الكبيرة والجبارة، بتبدأ جولتك التانية لمتحف “الفضيات” واللي بيضم أواني كتير مصنوعة من الذهب والكريستال وأطباق نُقش عليها رسومات وفنون مختلفة هتجذبك لها.
متحف الوثائق.. خير شاهد على التاريخ
لو حابب تعرف معلومات عن الأحداث التاريخية يبقى لازم تروح متحف الوثائق اللي جواه كتير من الوثائق التاريخية المصرية، اللي بتحكي عن أحداث مختلفة في أزمة متباينة، وكمان هيكون مرجع كويس جدًا لك لمعرفة تاريخ صدور الأحكام التاريخية المهمة، لأنه بيضم كتير من الفرمانات والأحكام المصرية.
متحف الأوسمة والنياشين.. تكريم العظماء
قدر المتحف ده يحتفظ بكل وسام ونيشان اتكرم به كل حاكم في مصر بداية من الملكية لغاية الجمهورية، والمتحف بينقسم لقسمين: القسم الأول بيضم ممتلكات بتعود لأسرة “محمد علي” والقسم التاني بيضم أوسمة ونياشين باقي الحكام.
متحف السلام.. هنا تيشيرت محمد صلاح
وفي ختام جولتك داخل متاحف “قصر عابدين” تقدر تزور “متحف السلام” واللي بيضم جواه هدايا كتير من رؤساء الدول العربية لرؤساء مصر، وكمان العديد من المصاحف العريقة، وهدايا الرئيس السيسي اللي اتبرع بها للمتحف، وكان من ضمنها تيشرت “محمد صلاح” اللي أهداه للرئيس السيسي وأهداه الرئيس للمتحف بعد كده.
وفي نهاية الجولة..
تعبت؟ تقدر بعد الجولة التاريخية دي ترتاح في الحديقة هتلاقي خضرة وكافيهات يعني جولة تاريخية وكمان ترفيهية، وكمان لو رايح بعربيتك هتلاقي البارك مجانًا.
العنوان: شارع مصطفى عبد الرازق، ميدان الجمهورية، قريب من قسم شرطة عابدين.
مواعيد العمل: يوميًا من الساعة 9 صباحًا وحتى 3 عصرًا ما عدا يوم الجمعة.
مقترح
الحياة في كايرو
خروجات خروجات.. استعدوا للانبساط في إجازة شم النسيم!
أماكن الخروجات خروجات شم النسيم +2
الحياة في كايرو
