The Definitive Guide to Living in the Capital , Cairo , Egypt

“كتاب الونس” للكاتب والصحفي حسام مصطفى إبراهيم، حقق نجاح كبير في الدورة الـ 51 لمعرض القاهرة الدولي للكتاب، والكتاب الصادر عن دار تويا للنشر، موضوعه هو الونس بالكتابة، والحب والفن، وبيحكي عن لحظات المتعة المسروقة من زحام الحياة، وعن دروس الحياة المختلفة.

غلاف الكتاب حقق نجاح كبير بسبب الصورة المميزة اللي عليه، وهي صورة لبلكونة موجودة في واحدة من عمارات جاردن سيتي بوسط القاهرة، وهي من تصوير المصور نور المصري.

وحكى حسام مصطفى إبراهيم قصة غلاف الكتاب، وقال: “خلال رحلة البحث عن غلاف كتاب الونس، أول ما شُفت صورة البلكونة العظيمة اللي في جاردن سيتي، قلت هي دي، بس كان لازم أوصل لصاحبها عشان حقوق الملكية الفكرية بتاعتها، وهنا ظهرت المشكلة”.

وأضاف حسام، في بوست كتبه على حسابه الشخصي بالفيس بوك: “رغم انتشار الصورة، مافيش ولا واحد من اللي حاططها وقايل فيها شعر، يعرف هي بتاعة مين، ما حدش أصلا كلّف خاطره عشان يعمل كده، واعتبرها ملكية خاصة ليه ومن حقه يعمل فيها اللي هو عايزه”.

وتابع: «بدأت أعمل سيرش على جوجل وبنج وأي محرك بحث أعرفه، وفضلت اتتبع نتايج كل محرك، وادخل للناس اللي ناشرينها وأسألهم عن صاحب الصورة، على فيس بوك وتويتر وبنترست وإنستجرام ولينكد إن…. ولا واحد كان عارف”.

وكمل حسام: “بدأت أخش على جروبات المصورين، ومدربي التصوير، وطلبة التصوير، واطلب الانضمام ليها، ولما أتقبل أحط الصورة وأسأل، وبرضه لا حياة لمن تنادي”.

بعد رحلة طويلة من البحث نجح حسام وبمساعدة صديق له في الوصول لمصور الصورة نور المصري، وتواصل معاه تليفونيًا، وعرض عليه استخدام الصورة في غلاف الكتاب، وبالفعل وافق المصور.

وبيحكي حسام: “لقيت نور بني آدم مهذب جدًا وخلوق ومتعاون، واتبسط باختياري الصورة كغلاف لكتابي ولم يتقاض مليمًا واحدًا، إنما عمل كده محبة وجدعنة، وبعت لي الكواليتي العالية من الصورة فورًا”.

كتاب الونس متاح حاليًا في معرض الكتاب، دار تويا، صالة 1، B59.