The Definitive Guide to Living in the Capital , Cairo , Egypt

بدأت النهاردة الخميس الدورة الثالثة لمهرجان الجونة السينمائي اللي نجح يوصل للعالمية، وبيشارك فيه نجوم وصناع السينما في العالم، وهيقام في منتجع الجونة السياحي، وهيشهد مسرح المارينا حفل الافتتاح، وخلال السطور اللي جايه هنقول لكم على تفاصيل الحفلة.

الحفلة هتبدأ بكلمة نجيب وسميح ساويرس وعمرو منسي وبشرى مؤسسي المهرجان، ومن بعدها كلمة انتشال التميمي مدير المهرجان، وهيتم تقديم لجان التحكيم لمسابقات المهرجان الثلاثة، وكمان هيتم تكريم مي المصري المخرجة والمنتجة الفلسطينية اللي هتحصل على جائزة الإنجاز الإبداعي، والحدث الأعظم أنه المهرجان هيحتفل بالنجم العالمي مينا مسعود، المصري الكندي، واللي وصل مصر بالفعل للمشاركة في المهرجان.

الصورة من مهرجان الجونة السينمائي – الدورة الثانية

والفنان أبو هيقدم استعراض غنائي جديد بمشاركة مجموعة من النجوم، وهيعرض بعده فيلم الافتتاح “أد أسترا” من بطولة جيمس جراي، وبراد بيت، وتوم لي جونز، واللي كان عرض في مسابقة مهرجان فينيسيا من كام يوم، وده هيكون بحضور مجموعة كبيةر من النجوم على رأسهم “يسرا، هند صبري، محمد رمضان، كندة علوش، عمرو يوسف، درة، ليلي علوي، إلهام شاهين، نيللي كريم، مروان حامد، باسل خياط، ظافر عابدين، فريد بوغدير” بخلاف مجموعة كبيرة جدًا من النجوم العرب والعالميين اللي بيحرصوا على المشاركة ومتابعة أفلام المهرجان وبرامجه المتميزة.

المهرجان هيعرض 80 فيلم متميز، كتير منها شارك في مهرجانات كبيرة وعالمية، ومنها اللي حصد جوائز مختلفة، والمنافسة هتكون على جوائز قيمتها 224 ألف دولار، وكمان هيكون فيه مائدة حوار خاصة بأصوات اللاجئين في السينما، وده بخلاف حلقات نقاش بعنوان “طبيعة الحدود الفاصلة بين الأفلام الروائية والوثائقية”، وكمان هيتم تنظيم محاضرات عن الترميم والحفاظ على الأفلام وجماليات تصميم الصوت ورحلة الوثائقي مع مي المصري.

وهيشمل المهرجان على حوار “مابين الواقع والشاشة” مع فريد بوغدير، وهتديره الفنانة هند صبري. وبالتعاون مع السفارة الأمريكية هيكون فيه حفلة موسيقية للاحتفاء بالأعمال الموسيقية الخالدة اللي ظهرت في أعمال سينمائية عالمية، وده تحت قيادة الموسيقار أحمد الصعيدي.