كل اللي محتاج تعرفه عن معرض الكتاب في 11 سؤال
تفاصيل عن معرض الكتاب سعر تذكرة المعرض معرض القاهرة الدولي للكتاب 2020 معرض الكتاب مواصلات المعرض
Cairo 360
الصفحة الرسمية لـ معرض القاهرة الدولي للكتاب في دورته الـ51، والمقرر انطلاقها يوم الأربعاء 22 يناير الحالي، واللي هتستمر لحد 4 فبراير الجاي، بمركز مصر للمعارض الدولية بالتجمع الخامس، نشرت عدد من الأسئلة المتكررة اللي ممكن يكون رواد معرض الكتاب بيدوروا على إجاباتها، ومنها أسئلة عن مواعيد المعرض، وأسعار التذاكر، وطريقة الانتقال للمعرض، بالإضافة إلى أماكن بيع الأكل والكتب داخل أرض المعرض.
تعالوا نعرف الأسئلة دي وإجاباتها مع بعض.
س/ المعرض إمتى وفين؟
ج: المعرض هيكون مفتوح للجمهور يوميًا بداية من 23 يناير ولحد 4 فبراير، بمركز مصر للمعارض الدولية خلف مسجد المشير طنطاوي في التجمع الخامس، على محور المشير.
س/ المعرض مفتوح يوم الجمعة؟
ج: أيوة، المعرض مفتوح يوميًا من 10 الصبح ولحد 8 مساءً، ويوم الجمعة من 12 الظهر ولحد 8 مساءً.
س/ تذاكر الدخول أشتريها منين وبكام؟
ج: تذاكر الدخول من البوابات الرئيسية بالمعرض، وبسعر موحد 5 جنيه، والدخول مجاني لأصحاب الهمم وأبناء الشهداء من القوات المسلحة والشرطة.
س/ ألاقي أتوبيسات المعرض إزاي وبتتحرك إمتى؟
ج: المعرض بيوفر 8 خطوط أتوبيسات من أغلب ميادين القاهرة والجيزة، هتلاقيهم في مواقف الأتوبيس بالأماكن المذكورة ومكتوب عليها “معرض الكتاب”، وبتتحرك بمعدل تقاطر ١٥ دقيقة من وإلى المعرض، وبسعر موحد ٦ جنيه.
س/ هل في جراجات لركن السيارات؟ وأزاي أجيب تصريح دخول السيارة للمعرض؟
ج: فيه جراج عمومي كبير أمام مركز مصر للمعارض الدولية.
س/ هل المعرض مجهز لذوي الاحتياجات الخاصة (أصحاب الهمم)؟
ج: المعرض بالفعل مجهز بمسارات خاصة وأسانسيرات لأصحاب الهمم، بالإضافة إلى الدخول مجانًا طول فترة المعرض.
س/ هل في مكان مخصص لبيع الأطعمة؟
ج: أرض المعارض بتوفر تواجد عدد كبير من المطاعم والكافيهات المختلفة بين قاعة ٢ و٣ طوال فترة المعرض.
س/ إزاي أعرف مكان بيع كتاب معين؟
ج: سيرش عن اسم الكتاب على جوجل ومن خلاله أعرف اسم دار النشر، وبعدها أعرف مكان الدار من خلال تطبيق معرض الكتاب.. الخريطة هتكون متاحة خلال الساعات القادمة.
س/ إزاي أروح المعرض وأنا من محافظات الأقاليم؟
ج: أركب قطارات السكك الحديدية المتجهة إلى محطة مصر، وهتلاقي أتوبيسات معرض الكتاب في ميدان رمسيس أو عبد المنعم رياض. ولو هتنزل موقف عبود هتلاقي أتوبيسات المعرض من المظلات. أما لو نزلت موقف العاشر هتلاقي أتوبيسات المعرض في موقف السلام أو اركب أي ميكروباص لمسجد المشير.
س/ هل سور الأزبكية موجود بالمعرض؟
ج: أيوة سور الأزبكية مشارك السنة دي بالمعرض من خلال ٤١ مكتبة، وهتلاقيهم في صالة ٤.
س/ هل في نشاطات مختلفة في المعرض؟
ج: أيوة، في أكثر من ٩٠٠ نشاط وفعالية خلال أيام المعرض، بتتنوع ما بين ندوات ثقافية وفكرية، وحفلات توقيع، وأنشطة للطفل، وعروض مسرح وأفلام سينمائية، ده غير استضافة عدد كبير من نجوم الفن والثقافة، وهيتم نشر جدول الفعاليات خلال ساعات، وتقدر يوميًا تعرف فعاليات المعرض قبل نزولك من خلال الصفحة الرسمية لمعرض الكتاب على فيسبوك، واللي بتنشر الفعاليات يوم بيوم.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
