The Definitive Guide to Living in the Capital , Cairo , Egypt

وسط البلد.. ملتقى ثقافي واجتماعي كبير مالهوش حدود، علشان كده اشتهرت بإنها منطقة المثقفين، وفيها كل حاجة يحتاجها أي حد من عشاق الثقافة والفنون، قهاوي، كافيهات، وورك سبيس، قعدات، حفلات، كل حاجة وأي حاجة وأي شكل من أشكال الثقافة، هتلاقيه في وسط البلد.

من أهم الحاجات اللي بتميز منطقة وسط البلد كمان هي المكتبات، غالبًا كل أنواع المكتبات موجودة ومنتشرة وسهل توصلوا ليها، وعلشان كده فريق كايرو 360 قرر يعمل لكم خريطة لمكتبات وسط البلد، واللي أكيد هتلاقوا احتياجاتكم اللي بتدوروا عليها في واحدة منهم:

الشروق:

مكتبة شاملة ومتكاملة، فيها كتب عربي ولغات مختلفة، وكمان فيها كتب مترجمة، ومهما كان اللي محتاجينه من إصدارات الدار أو دور النشر التانية سواء مصرية أو عربية أو عالمية هتلاقوا عندهم.

المكتبة موجودة في (1) ميدان طلعت حرب – بجوار العزبي.. تقدروا تتواصلوا معاهم على رقم 0223912480.

 

مدبولي:

هتلاقوها في الناحية التانية من ميدان طلعت حرب، وخلينا نتفق إنها من أشهر وأقدم مكتبات وسط البلد، وعندهم كل أنواع الكتب، مهما كانت ميولكم.

مدبولي موجودين في (6) ميدان طلعت حرب، وتقدروا تتواصلوا معاهم على رقم 01001738482.

 

آفاق:

ليها إصدارات كتير، سواء علمية أو ترجمات، لكن الإصدارات المتميزة والأكثر نشرًا عندهم هي الإصدارات الأدبية، ويعتبروا متخصصين فيها.. كمان عندهم تقريبًا كل إصدارات دور نشر بيروت، وأكيد هتلاقوا عندهم أي إصدارات أدبية مترجمة أو محلية.

مكانهم في (4) شارع كريم الدولة – من محمود بسيوني، وتقدروا تتواصلوا معاهم على رقم 2392611402.

 

دار المعارف:

هتلاقوا فيها كل اللي أنتم محتاجينه من إصدارات دار المعارف، وأسعارهم في متناول الجميع، وكمان متاح فيها كتب مناسبة للأعمار الصغيرة.

دار المعارف موجودة في (27) شارع عبد الخالق ثروت – تقاطع شارع شريف، وممكن تتواصلوا معاهم على رقم 0223936123.

الأنجلو المصرية:

معروف عنها إنها مكتبة عريقة، وفيها كتب قيمة جدًا في مجالات كتير، زي الفلسفة والمنطق وعلم الاجتماع والتاريخ والآثار وعلم المكتبات ومناهج البحث، وغيرها من المجالات اللي هترضيك كقارئ مهما كان ذوقك في الكتب.

موجودين في (165) شارع محمد فريد – تقاطع عبد الخالق ثروت.. تقدروا تتصلوا بيهم على رقم 0223914337.

 

تنمية:

المكتبة دي هتوفر لك أفضل الكتب والروايات العربية والعالمية مهما كان صعب تلاقيها، وعندهم ترجمات كتير بترضى طموح القراء.. وأسعارهم كمان في المتناول.

مقرهم في (19) شارع هدى شعراوى – بجوار وكالة أنباء الشرق الأوسط، وتقدروا تتصلوا بيهم على رقم 0223926249.

 

ليلى:

لو بتدوروا على مراجع مهمة، سواء في التاريخ أو الاقتصاد أو السياسة او الاجتماع، أو عاوزين روايات جديدة ناجحة، فده هتلاقوه في مكتبة “ليلى” اللي موجودة في (17) شارع جواد حسنى، وتقدروا تتصلوا بيهم على رقم 0223924475.

 

 

 

كنوز:

وهي فعلًا  فيها كنوز، لإن فيها أمهات الكتب والإصدارات الأكاديمية، وكتب سياسية بتناقش قضايا كتير.

موجودين في (14) شارع جواد حسني، وتقدروا تتصلوا بيهم على رقم 01227717795.

 

عمر بوك ستور:

هتلاقوا عندهم كل إصدارات دور النشر المصرية والعربية والمترجمة تقريبًا، وكمان بيوفروا مساحة كبيرة للروايات وكتب الأطفال.. مقرهم في (15) شارع طلعت حرب – أعلى مطعم فلفلة، وتقدروا تتصلوا بيهم على رقم 0223960047.