The Definitive Guide to Living in the Capital , Cairo , Egypt

فن وثقافة

“لو خرجت من القاهرة أموت”.. حوار مع “نبيل فاروق” مؤلف رجل المستحيل

أحمد مراد أدهم صبري الجاسوسية المؤسسة العربية الحديثة د. نبيل فاروق رجل المستحيل زهور سينما فيلم رجل المستحيل كتب الجيب كوكتيل 2000 ملف المستقبل
“لو خرجت من القاهرة أموت”.. حوار مع “نبيل فاروق” مؤلف رجل المستحيل
بواسطة
Mohamed Hamdy

رجل المستحيل.. أو أدهم صبري. ضابط المخابرات المصري المحترف اللي بيقدم لنا مغامرات رائعة ومتميزة باستمرار. هو مجرد شخصية واحدة من بنات أفكار الدكتور نبيل فاروق. الطبيب المصري اللي قرر ترك الطب – وترك مدينة طنطا اللي نشأ فيها- والتوجه للقاهرة علشان يتفرغ للكتابة.

وخلال وقت قصير – وحتى يومنا هذا – ترك دكتور نبيل بصمة لا يمكن نسيانها في الأدب الشبابي المصري والعربي، مش بس بسبب شخصية أدهم صبري أو سلسلة رجل المستحيل. لكن علشان سلاسل روايات متنوعة زي ملف المستقبل وكوكتيل 2000 وزهور وفارس العدالة وغيرها من السلاسل المميزة والناجحة واللي قامت بعملية مصلحة بين جيل من الشباب وبين الكتاب.

وبمجرد معرفتنا بنية الدكتور نبيل تحويل روايات رجل المستحيل لفيلم سينما. قررنا نزوره في مكتبه علشان نعرف أكتر عنه وعن مشروعه السينمائي الجديد وتفاصيل أكتر عن أعماله القادمة.

القاهرة بتمثل لك إيه؟

بتمثل لي الحياة الجديدة.. أنا قضيت جزء كبير من حياتي في مدينة طنطا واتخرجت من طب طنطا وقضيت الامتياز في الصعيد. لكن بعدها بسبب ظروف الشغل كان لازم انتقل للقاهرة. وأول ما جيت حسيت أنها عالم جديد أوسع وأكبر وكل المراكز الرئيسية موجوده فيه. فكنت مرتبك جدًا في البداية لكن حاليًا ماقدرش أعيش خارج القاهرة.

ولو رجع بيك الزمن تكرر نفس التجربة؟

أكيد. لأن ظروف العمل كانت تحتم انتقالي. علشان أعرف أشتغل صح. كمان كان لازم أخد قرار قاطع علشان تعليم إبني (شريف) كان بيبدأ. وكان لازم أختار بين طنطا والقاهرة. وأخترت القاهرة.

وبتحب تتمشي وتاكل فين في القاهرة؟

بحب السوشي جدًا. وباكل السوشي في مطعم في المعادي. وحتى لما بسافر بره بحب أجرب السوشي في أي بلد أسافرها. وأكتر مكان أحب أتمشى فيه هو الرحاب لأنها هاديه جدًا وكلها خضرة وشجر. وبصراحة هي مكان ممتع للمشي.

ليه تأخر إطلاق رجل المستحيل كفيلم سينمائي كل السنوات دي؟

القرار كان في إيد المنتجين السينمائيين، وأخدوا وقت لحين اقتناعهم بجدوى تحقيق رجل المستحيل من روايات الى فيلم سينمائي. وقبل كده كان فيه تخوف من التكلفة العالية للإنتاج السينمائي، وفي النهاية ماكانش مضمون أن كل الناس تحب رجل المستحيل على الشاشة. لكن في النهاية لما لقوا أن الشخصية منتشرة مش بس في مصر لكن في الوطن العربي كله قرروا ينتجوا فيلم بميزانية عالية جدًا.

وليه قررت تشارك الجمهور على حسابك في (تويتر) بعملية اختيار بطل فيلم رجل المستحيل؟

لازم الجمهور يشارك في اختيار الشخصية علشان ليهم تصور مسبق في ذهنهم عن شخصية رجل المستحيل. بالتالي مشاركتهم في الاختيار كانت أساسية. وكان صعب نجيب وجه جديد يقدم الشخصية علشان المنتجين كانوا هيرفضوا. وأحنا هنا غير هوليوود.

يعني لما قررت هوليوود تحويل جيمس بوند لشخصية سينمائية كان المفترض يختاروا نجم للبطولة. لكنهم قرروا يعملوا مغامرة جديدة ويراهنوا على وجه جديد لتقديم فيلم عالي الميزانية. وبالفعل عملوا مسابقة واتقدم لها بطل السلسلة (شين كونري) لكنهم رفضوه في البداية. ولما شافه المخرج من شباك مكتبه بيولع سيجارة جنب العربية بعد ما رفضوه قرر أنه يصلح شكليًا وجسديًا للشخصية للي كانت في دماغه. وحققت السلسلة نجاح ساحق.

وهل استقريتم فعلًا على الاسماء النهائية للشخصيات؟

لسه.. لكننا عرضنا الموضوع على مجموعة من الفنانين ومعظمهم بانتظار كتابة السيناريو. وحاليًا أحمد مراد بيكتب السيناريو علشان نبدأ نعرضه على الفنانين ونستكمل العمل بإذن الله.

وإزاي وقع الاختيار على أحمد مراد لكتابة السيناريو؟

المنتج سألني هل عندك اعتراض على أحمد مراد ككاتب سيناريو للفيلم؟ فا قولت له بالعكس أنا برحب جدًا. والحقيقة أن مراد كاتب كويس جدًا وقاري شخصية رجل المستحيل بشكل رائع. والميزة أن المنتج والمخرج والسيناريست من قراء رجل المستحيل. بالتالي الفيلم متوقع له تحقيق النجاح بإذن الله.

والفيلم هايكون عن رواية قديمة من روايات رجل المستحيل ولا عن عمل جديد؟

الفيلم عن قصة  جديدة خالص لكن بنفس شخصية أدهم صبري. ما حبيناش نحرق الأحداث باختيار قصة قديمة للفيلم.

عرفنا  كمان عن تحويل رواية (أرزاق) لمسلسل درامي.. فيه خطوات جديدة؟

بالفعل تم شراء حقوق تحويل الرواية لمسلسل لكن لسه مافيش اختيارات للممثلين أو كتابة للسيناريو أو أي خطوات في المشروع ده.

لو رجعنا للكتابة في عالم الجاسوسية. امتى بينتهي الواقع ويبدأ الخيال في الروايات دي؟

الخيال بيمثل حوالي 70% من الأعمال دي. حتى أن الأعمال اللي بيتكتب عليها بالفونت العريض: (مقتبسة عن ملفات المخابرات المصرية) بيكون حجم الخيال فيها أكبر من الواقع بكتير. لأن الرواية لو واقعية تمامًا المخابرات هاتكشف فيها طريقة عملها وتكنيك تصرفاتها. وده مستحيل يحصل.

وساعات بتكون الحقيقة أقل من 30% كمان. يعني مثلًا مسلسل رأفت الهجان واللي كتبه صالح مرسي الله يرحمه لما كتب عن رأفت الهجان المخابرات أعطته 3 صفحات فقط. كل صفحة كانت جزء من أجزاء المسلسل. وهو كمل الباقي بالدراما من عنده. ولما يكون الكاتب فاهم شغل المخابرات بيقدر يعمل دراما أجمل بكتير.

وفهم الكاتب لعالم المخابرات بيكون من خلال تعاون الجهاز معاه ولا من بحثه الشخصي؟

الأثنين… لازم الكاتب يكون عنده الموهبة والقدرة على استيعاب العالم ده. وهو عالم من أصعب العوالم اللي ممكن تعرفها. لأنه عالم السهل الممتنع. يعني لازم العملية تكون (صعوبتها تكون في سهولتها). ومن هنا لازم المؤلف والمخرج يفهموا الجزئية دي. وفيه كتب كتير بتدرس علم المخابرات وأصول التفكير فيه. وقدرت أكون مكتبة ضخمة في عالم الجاسوسية والمخابرات بالعربية ولغات تانية. وده بيساعدني أفهم العالم ده.

وأيه اللي اكتشفته من الغوص في العالم ده؟

من ضمن الحاجات اللي فهمتها هي نفسية الجاسوس وقدرته على التحكم في أعصابه. وكان نفسي العلم ده يكون متاح لكل البشر. لأننا في مصر مؤخرًا عندنا حالة انفلات أعصاب بتخلي ممكن خناقه بسيطة تنتهي بجريمة قتل. وللأسف بنسمي الأمور بإسم غلط. زي أننا نسمي انفلات الأعصاب بإن الشخص ده (دمه حامي) وده غلط. لأنه يعتبر مرض والمفروض الشخص يتعالج. لكننا بنتباهي بيه وده بيخلينا مش عارفين نعالجه.

ودرست علم الجاسوسية لمدة كام سنة؟

أزيد من 30 سنة. وما أقدرش أزعم أني ألميت بكل تفاصيله لإني كل شوية بكتشف أن في حاجات جديدة ماكنتش أعرفها خالص. حتى لما بقعد مع أبطال العمليات الأصلية بكتشف أحداث مكانتش تخطر على بال حد. ومن هنا بتيجي احترافية المخابرات أنها عملت حاجات لا تخطر على بال بشر!

الشباب أنتظر وقت طويل جدًا للكشف عن تفاصيل شخصية رجل المستحيل الحقيقية.. هل جاء الوقت؟

للأسف الوقت لم يحين بعد. لأن قبل الكشف عن شخصية أي حد لازم نتأكد أن الموضوع لن يأذي أي شخص. وفيه جهات أعلى هي اللي بتحدد الأمور دي وتوقيت الكشف عنها.

مع تقدم التقنيات. هل لسه الجاسوس شخص مؤثر على أرض الواقع؟ ولا الكمبيوتر والأنترنت لغوا عمله؟

الجاسوس الشخص هو الأساس. وأي حاجة تانية تظهر جنبه هي مجرد تقنية مساعدة. يعني أدوات الجاسوس تطورت عن زمان لكن لا غنى عن الجاسوس. يعني مثلًا التصوير زمان كان من خلال أجهزة كبيرة ثم بدأت تكون أصغر في الحجم. فمع الوقت أصبح مافيش مشكلة في التصوير لكن لا استغناء عن الشخص اللي بيعمل العملية نفسها.

إيه رأيك في عالم تويتر اللي دخلته مؤخرًا وبدأت التواصل مع قراءك من خلاله؟

أنا بتواصل مع القراء من زمان من خلال الجوابات. وكان صعب أيامها أتواصل مع عدد كبير بسبب مساحة النشر وتأخر الردود. لكن النهارده الأمور تطورت وأصبحت أسرع وأصبحت أقدر أتواصل مع عدد أكبر بشكل أسرع. وحسابي على تويتر @DrNabilFarouk هو حسابي الرسمي رغم تشكيك بعض الناس. علشان كده عملت لهم فيديو وضحت إني صاحب الحساب. وجاري العمل على توثيقه. لكني شايف أن الثقة أهم من التوثيق.

إيه اللي اختلف في نوعية القارىء نفسه زمان عن دلوقتي؟

نوعية الشاب قبل 2011 غير بعد 2011.. للأسف الأحداث خلقت جيل من الشباب عنده تعصب شديد لرأيه. ورفض لمجرد الرفض. وكل واحد شايف أن رأيه صح وأي حد ضده هو خائن وعميل. لكن الحقيقة هي أن ربنا خلقنا مختلفين. وربنا عاوزنا مختلفين علشان نعرف بعض ونكتسب من الآخرين اللي ينقصنا مش علشان نختلف ونتخانق.

ماذا عن أعمالك القادمة؟

أحتمال أبدأ من ديسمبر التدريس في أحد المراكز عن التنمية الذهنية. وهي تعليم طريقة التفكير المنطقي والصحيح. والفهم الصحيح لكلمة منطق بالأساس. وهنعلن عن تفاصيل الموضوع ده قريباً بإذن الله.

وأخيرًا… تقول إيه لمتابعينك في كايرو360؟

على الرغم من أني اتولدت وعشت فترة طويلة في طنطا. لكن مع استمراري في القاهرة وإقامتي فيها أصبحت جزء أساسي من حياتي ولو طلعت منها أموت زي السمك لو خرج من المياه.

مقترح