The Definitive Guide to Living in the Capital , Cairo , Egypt

كل يوم اثنين من كل أسبوع
الساعة 5 مساءً ممكن تروح متحف أمير الشعراء أحمد شوقى.

أحمد شوقى؟.. طبعًا جاء
فى دماغك على طول: “النيل العذب هو الكوثر..
والجنة شاطئه الأخضر” وأناشيد ابتدائى وأغانى أم كلثوم الجميلة، طبعًا
هـ تقول متحف أحمد شوقى يعنى بيت أحمد شوقى، البيت ده تم بناؤه فى العشرينيات لكن
تم افتتاحه كمتحف سنة 1977 وما كانش مجرد بيت على فكرة، كان دائرة ثقافة والدليل
على كده جناح محمد الوهاب اللى تبنَّى موهبته أحمد شوقى، ومش بس كده ده عمل له
جناح فى بيته علشان يوفر له جو مناسب للإبداع، طبعًا دى حاجة مش ممكن تحصل
النهارده.

طب أنا هـ أروح أعمل إيه
هناك؟ ما تخافش مش هـ تروح تتفرج على بيت من طراز قديم أو موبيليا أثرية وخلاص، أنت
أول ما تدخل من بوابة المتحف وتمشى يمين فى الحديقة هـ تلاقى تكعيبة عنب اسمها “كرمة
ابن هانئ” المهم أن التكعيبة دى ممكن تقضى فيها وقت من أسعد أوقاتك، ممكن
تسمع شعر يأخذك للعالم اللى أنت عايش فيه ومش واخد بالك منه. طبعًا مش زى الشعر
اللى كنا بـ نحفظه فى كتب المدرسة وغالبًا ما كناش بـ نحفظه أصلاً، اللى هـ تسمعه
شعر مختلف. وبعد ما تسمع شعر هـ تسمع موسيقى وممكن طرب وممكن تسمع مربعات صعيدى
على الربابة وكمان تسمع موسيقى على العود فقط، وتخيل نفسك لوحدك تحت التكعيبة دى وعازف
العود بـ يعزف لك أنت وبس. على فكرة هـ تروح تلاقى اللى هناك شباب مش شوية عواجيز
وخلاص، شباب بـ يحب الشعر والموسيقى.

كل ده فى حديقة المتحف
فقط، لكن لما تدخل المتحف نفسه فى الدور الأول جناح الفنان محمد عبد الوهاب للناس
اللى بـ تحب الكتب القديمة اللى ورقها أصفر هـ تلاقى مكتبة فيها 332 كتاب مهمين جدًا،
ولعشاق النوادر والمخطوطات هـ يلاقوا مخطوطات ومسودات لأعمال أمير الشعراء، هـ تلاقى
مثلاً أبيات شعرية على ورقة سيجارة أو منديل. أما فى الطابق العلوى هـ تلاقى -بالإضافة
إلى غرف النوم- مجموعة لوحات زيتية وتحف وصور مش ممكن تلاقيها فى مكان ثانى.

فيه كمان ورش فنية كثير بـ
تتم داخل المتحف زى ورش عرائس الماريونت، مين فينا وهو صغير ما كانش نفسه يحرك
عروسة ماريونت ويغنى “الليلة الكبيرة يا عينى والعالم كثيرة” فى الورشة
دى هـ تتعلم إزاى تحرك عروسة ماريونت، مش بس كده أنت كمان هـ تتعلم إزاى تصممها
بنفسك.

أما بقى الفن التشكيلي
اللى إحنا عمالين نسمع أنه مجرد شخبطة صدقنى لو رحت ورشة الفن التشكيلي فى المتحف
هـ تغير فكرتك ويمكن تفكر تكتشف فى نفسك موهبة أنت مش عارفها.

ممكن اللى إحنا قلناه ده
كله يكون مفاجأة، لكن المفاجأة الأكبر أن الدخول بـ 50 قرش بس، ثقافة وفن واستمتاع
بـ 50 قرش. وفيه كمان هناك ورش نقد أدبى وورش تعلم موسيقى.

ممكن تستغل ساعتين من وقتك كل أسبوع تنقى روحك وتستمتع استمتاع مفيد، ولما
تروح هـ تعرف أنه مش مجرد متحف وبس.

أنت لسه قاعد؟.. المتحف موجود في 6 شارع أحمد شوقى كورنيش النيل بالجيزة.