The Definitive Guide to Living in the Capital , Cairo , Egypt

تحديث: تم غلق المتحف نهائيًا ونقل جميع مقتنياته إلى متحف الحضارة، فضلنا ترك المقال كما هو كعملية توثيق للمتحف ومكانه الأصلي.

رغم حداثة نشأته، نجح متحف النسيج المصري في السنوات الأخيرة في إنه يكون مركز ثقافي مهم في القاهرة، وأصبح بالفعل وجهة فنية وثقافية للزائرين المصريين والأجانب، وأكتر حاجة لازم نكون فخورين بيها كسكان للقاهرة هي إن متحف النسيج المصري هو الأول من نوعه في الشرق الأوسط.

المتحف افتتح لأول مرة يوم 13 فبراير سنة 2010، في مبنى تاريخي مهم وهو سبيل محمد علي بشارع المُعز بقلب القاهرة الفاطمية.

المتحف بيتكون من دورين فيهم 11 قاعة، بتعرض القطع النسيجية الأكثر ندرة تاريخيًا، بداية من العصر المصري القديم مرورًا بالعصر الروماني واليوناني، والفن القبطي، وتطور صناعة النسيج في العصور الإسلامية بداية من العصر الأموي ثم العباسي مرورًا بالعصر الطولوني والفاطمي والأيوبي والمملوكي والعثماني، ولحد عصر الدولة الحديثة التي بدأت بحكم أسرة محمد علي.

وبيضم متحف النسيج ثروة كبيرة بتصل إلى أكثر من 1000 قطعة من المنسوجات النادرة اللي بتؤرخ لتاريخ النسيج في عصور مختلفة بتبدأ من العصر الفرعوني ولحد العصر الحديث، وتم تخطيطه بطريقة بسيطة لكن جميلة.

بتضم كل غرفة من غرف المتحف معلومات على الحوائط عن الفترة اللي بتنتمي ليها المنسوجات وتاريخ صنعها، وقصتها التاريخية.

وبيعتبر شارع المُعز اللي فيه المتحف واحد من أشهر المناطق الأثرية المصرية، وده خلاه أكبر المتاحف المفتوحة للفن الإسلامي في العالم، وبيضم عدد كبير من المباني الأثرية الفريدة اللي اتحول بعضها لمراكز للإبداع الفني والثقافي، منها بيت السحيمي ومجموعة السلطان قلاوون اللي بتضم مسجد ومدرسة وقبة على الطراز الإسلامي المملوكي.

تحديث: تم غلق المتحف نهائيًا ونقل جميع مقتنياته إلى متحف الحضارة، فضلنا ترك المقال كما هو كعملية توثيق للمتحف ومكانه الأصلي.