The Definitive Guide to Living in the Capital , Cairo , Egypt

الصور: محمد صالح

المتاحف الفنية في مصر لها طبيعة خاصة، ولها معجبين وزوار مصريين وأجانب، ومن أهم المتاحف الفنية في القاهرة، متحف الفنان محمد عبد الوهاب (13 مارس 1910 – 4 مايو 1991) الموجود بمعهد الموسيقى العربية بوسط القاهرة، وفيه مجموعة نادرة من مقتنيات الفنان الراحل وممتلكات مهمة، وخلال السطور الجاية هنتعرف على ملامح مشوار موسيقار الأجيال من خلال متحفه اللي بنشجعكم على زيارته الشهر ده بشكل خاص، لأنه شهر ميلاد الموسيقار الكبير.

اشتهر محمد عبد الوهاب بأنه مبتكر موسيقى وليس مجرد ملحن ومغني، وعلشان كده لسه أغانيه وألحانه موجودة معانا لحد النهاردة بتثير إعجاب أجيال مختلفة، والمتحف الخاص بموسيقار الأجيال بيوضح ملامح مشواره من خلال قاعة “الذكريات” واللي بتنقسم لقسمين، أولهم بيوضح طفولته ونشأته وخطواته الأولى في عالم الموسيقى والسينما، وعلاقته بالكتاب والفنانين والتكريمات والجوائز اللي حصل عليها، والقسم الثاني بيضم غرفة نومه ومكتبه ومجموعة من الأثاث الخاص به ومتعلقاته الشخصية.

كمان المتحف فيه قاعة سينما بيتعرض فيها كل الأفلام اللي شارك فيها الفنان محمد عبد الوهاب وبيتم عرضها من خلال شاشات خاصة، ده غير قاعة الاستماع والمشاهدة اللي فيها مكتبة كاملة متكاملة لكل أعماله الموسيقية وألبومات الصور الخاصة به وممكن فحصها بشاشات تعمل باللمس.

من مقتنيات متحف موسيقار الأجيال محمد عبد الوهاب كمان، مستلزماته الشخصية والأثاث الخاص به، ومجموعة من الصور اللي بترصد حياته من مبلاده حتى وفاته، وصور من أفلامه وصور مع بعض أصحاب السلطة مثل “حافظ الأسد – محمد نجيب – جمال عبد الناصر – أنور السادات”، وبعض الفنانين والشعراء منهم “أحمد شوقي –  فاطمة رشدي – أم كلثوم – عبد الحليم حافظ – إحسان عبد القدوس – فريد الأطرش – يوسف وهبي – فاتن حمامة”، وغيرهم، وكمان من ضمن المقتنيات ااشخصية أدواته الموسيقية الفريدة زي “العود – البيانو – الأسطوانات النادرة – شرائط التسجيل – جهاز راديو”، ومعاهم كمان مجموعة من السيوف والخناجر ومجسم لمسجد قبة الصخرة، ومجموعة نادرة من الأوسمة والنياشين والدروع.

العنوان:

متحف الفنان محمد عبد الوهاب موجود في معهد الموسيقى العربية  – شارع رمسيس بجوار محطة الإسعاف وبالقرب من دار القضاء العالي.