The Definitive Guide to Living in the Capital , Cairo , Egypt

يمنى أحمد

لو ركزت هتلاقي الفن داخل في تفاصيل حياتنا كلها، في الحاجات البسيطة اللي ماحدش بياخد منها غالبًا غير أصحاب التفاصيل، في نقشة الملعقة وإحنا بناكل، في رسومات وأشكال المفارش اللي بننام عليها، راقب عينك لما تقع على أي حاجة وغالبًا هتلاقي فيها شيء من الفن. والقاهرة أم الفنون، كل حاجة فيها نوع من الحرفية والفن. إحنا اخترنا الحديث عن نقوشات محطة مترو الخلفاوي بشكل خاص في المقال ده، لأنه بيعرفنا إيه أصل الفن في القاهرة أو بمعنى دقيق يعني إيه إبداع في أبسط الأمور.

 

محطة مترو الخلفاوي سميت باسم المنطقة اللي موجودة فيها بشبرا الخيمة، وهي في الخط الثاني لمترو القاهرة الكبرى، وترجع تسمية المحطة دي إلى شخصية تاريخية شهيرة وهو الشيخ محمد أبو العلا الخلفاوي، الشيخ الأزهري الثائر الجامح والذي وقف في وجه الخديوي توفيق أثناء الثورة العرابية، فقاموا بتسمية منطقة الخلفاوي بشبرا على اسمه، ومنها تم اشتقاق اسم محطة الخلفاوي.

في نفس المنطقة، تم تأسيس أول مدرسة للفنون الجميلة بها، وكان عنوانها تحديدًا الفيللا رقم 11 بمنطقة الخلفاوي، في العام 1927، فكان قرار الفنان سامي رافع الذي صمم جدرايات عدد من محطات مترو الأنفاق أن تكون جدارية محطة مترو الخلفاوي ذات صلة وثيقة بالفن، فصممها على هيئة “بالتة ألوان”، تخرج منها ألوان كثيرة في شكل متناسق متناغم وبديع، في إشارة إلى مدرسة الفنون الجميلة التاريخية التي تم إنشائها بهذا المكان.

محطة مترو الخلفاوي مش دايمًا زحمة، نظرًا لأنها مش محطة تبادلية أو منطقة مركزية، وده هيعطي ليك الفرصة في التأمل بهدوء واستدعاء كتير من الذكريات الحلوة بينك وبين الفنون أو بين حصة الرسم في المدرسة.

دايمًا لما تدرب عينك على رؤية تفاصيل الفن، وتعلم قلبك إزاي يحب التفاصيل دي، هيفرق في تفكيرك، وهيبقي عندك وراء كل حاجة بتشوفها علامة استفهام علشان تقدر تستوعبها لما تبحث عنها بعدين، متخليش زحمة الدنيا توريك قسوتها، واقف لو ثانية بسيطة تأمل جدراية مترو الخلفاوي، هتصيب قلبك بالفرحة، وهتبقى حياتك ألوان، وألوان كتيرة مش مجرد لونين أو تلاتة.