The Definitive Guide to Living in the Capital , Cairo , Egypt

من المعروف أن فن العرائس من الفنون الشعبية القديمة جدًا، وبيرجع أصله للعصر الفرعوني وتطور من خلال الثقافة الأسيوية القديمة، ولكنه نشط وازدهر في بلاد العرب، وكان وسيلة التسلية لناس كتير لأنه بيعتمد على الحكي للقصص والحكم والقيم بكل أنواعها، وهو فن تعليمي وتثقيفي للأطفال وبيجمع ما بين فن صناعة العرائس والإخراج والتمثيل والتحريك والآداء الصوتي، ومن أشهر الأماكن اللي بتقدم الفن ده في مصر، مسرح القاهرة للعرائس بالعتبة.

انزل بعينك تحت شوية علشان تعرف حكاية المسرح.

مسرح القاهرة للعرائس بيقدم دراما بتجسد كل أنواع المشاعر من حزن وضحك وفرح وبكاء، وده بيخلي المتفرجين وخاصة من الأطفال مايحسوش بالملل، وكمان بيتسخدموا فيه مؤثرات بتخلي الأشخاص يندمجوا في الأحداث فبيتنقل بخياله للعرض ويتفاعل معاه.

ومن المميزات المهمة في مسرح العرائس أنهم بيقدموا حوار مناسب عن طريق العرائس المارونيت اللي بتتحرك بخيوط بمهارة عالية فبتشعر الأطفال أن العروسة بالفعل هي اللي بتتكلم وبتتحرك لوحدها.

والعرائس دي أنواع كتير مختلفة بتتقدم على المسرح الأكبر في القاهرة وفيه منها “الدمي القفازية” ودي بتتحرك عن طريق اليد من شخص بيستخبى تحت طاولة بتظهر منها العروسة وبيكون بيعرف يقلد أصوات كتير، وأشهر حاجة في مصر للدمى القفازية “الأراجوز”.

كمان فيه خيال الظل واللي بتكون قماشة بيضاء وراها مصباح وبتنزل عليها الدمية بحبل من فوق وبتكون بين الشاشة والمصباح المخصص فبتعكس ظلها على الشاشة، وتبدأ الحكاية والحواديت حسب كل شخصية.

أما الماريونيت بتكون عروسة متوصلة من فوق بخيوط بكل أعضاء العروسة وأكتر الوقت بتعرض شخصيات متمردة وبتخالف كل حاجة، وبعدها فيه “عروسة العصي” وهي مشابهة لفكرة خيال الظل وبيتم تثبيت العروسة بعصايا من الأسفل وبتتحرك حسب احتياج العرض.

ومسرح العرائس في العتبة بيقدم كل فترة مسرحية مختلفة بفنون ترضي كل الأطفال واللي بيتمتع بيها الكبار كمان.

العنوان: شارع 26 يوليو – العتبة – وسط القاهرة.

وتقدروا تعرفوا أكتر عن المسرح ومواعيد عروضهم من خلال صفحة الفيسبوك من هنا.