مش بس كتب.. حاجات ممتعة ممكن تعملها في مكتبة ديوان المعادي
ديوان المعادي عنوان مكتبة ديوان كتب مكتبات المعادي مكتبات في القاهرة
Cairo 360
رنا شرف
الكتب عالم جميل وساحر، ممكن ياخدك من مكان لمكان تاني خالص، وحتى تفكيرك بيتغير لأن القراءة بتوسع مدارك الإنسان. ولكل محبي القراءة والكتب، إحنا قررنا النهارده ناخدكم لمكان مميز بالنسبة لكم.
لو فاكر إن المكتبة هي مجرد مكان لبيع الكتب تبقى غلطان، تجربتنا في مكتبة ديوان فرع المعادي كانت مميزة بجد! مش مجرد مكان بيعرض كتب، لكن المكتبة بتقدم حاجات تانية ممتعة.. تعالوا نعرف إيه هي.
مش مجرد مكتبة لبيع الكتب
في شارع 213 في منطقة دجلة بالمعادي، لفت نظرنا مكان جميل ومبهج، مكتبة ديكورها مميز، دخلنا المكتبة لقينا كل أنواع الكتب اللي ممكن تتخيلها، غير الكتب العربية هتلاقوا كتب باللغة الإنجليزية وبلغات تانية أكتر، وفيه قسم مميز لكتب الأطفال، مع كتب دينية وكتب تنمية بشرية، وروايات وأكتر.
لقينا جوه المكتبة كمان منتجات هاند ميد ومحافظ ومجات فنية جميلة وشنط، كمان فيه منتجات عناية بالبشرة والجسم لبراند مصري اسمه أريج.
المكتبة فيها مكان أوت دور جميل، فيه ترابيزات وكراسي، وملحق بالمكتبة مطعم بيقدم أكلات صحية وسلاطات مميزة ومشروبات.
الأسعار في اللطيف، كمان الأكل صحي وده عجبنا جدًا، لقينا هناك سلاطة يوناني حكاية وسلاطة جمبري تحفة ومشروبات جميلة زي المانجا والبرتقال والليمون والنعناع.
يعني تقدروا تعتبروا المكتبة خروجة متكاملة ومش تقليدية، وبعد ما تشتري كتابك هتقدر تشرب قهوتك أو تاكل حاجة صحية مع عصير، أو تشتري أي حاجة من المنتجات اللي بتحبها واللي موجودة في المكان.
المكان فيه طاقة مبهجة حقيقية ولو عاوز تغير جو وبتحب القراءة وعايز تشتري كتب جديدة يبقي ده مكان مناسب جدًا ليك.
عنوان المكتبة: 1 شارع 245 تقاطع شارع 213 دجلة المعادي.
تليفون: 01098887326
مقترح
معالم وسياحة
المتحف القبطي بالقاهرة.. هنا أكبر مجموعة آثار قبطية في العالم
المتحف القبطي المتحف القبطي المصري +3
الحياة في كايرو
