The Definitive Guide to Living in the Capital , Cairo , Egypt

مش كتب وبس.. 12 فرقة فنية هتشارك في معرض الكتاب 2020
بواسطة
Mohamed Talaat

لو فاكر إن معرض القاهرة الدولي للكتاب 2020 مكان للكتب وبس تبقى غلطان، المعرض هيكون فيه أنشطة فنية وثقافية تانية مهمة، أبرزها إعلان الهيئة العامة لقصور الثقافة عن مشاركتها السنة دي في النسخة الـ 51 من المعرض، واللي هيكون في مركز المعارض والمؤتمرات الدولية بالقاهرة الجديدة من يوم 22 يناير وحتى 4 فبراير، ببرامج فنية لفرق موسيقية وفنون شعبية، وده هيكون في قاعة الفنون في مركز المؤتمرات.

برنامج الفرق هيبدأ من يوم 23 يناير وهتكون البداية مع فرقة الأقصر للفنون الشعبية، ويوم 24 يناير هيكون فيه عرض فني لفرقة وتريات الفيوم للموسيقى، أما 25 يناير فده يوم فرقة كفر الشيخ للفنون الشعبية، و26 يناير هتقدم فرقة محمد عبدالوهاب للموسيقى العربية عروض غنائية وموسيقية مميزة.

كمان هيكون من بين المشاركين يوم 27 يناير فرقة الإسماعيلية للفنون الشعبية، ويوم 28 يناير فرقة بني سويف للفنون الشعبية، ويوم 29 يناير هيكون موعدكم مع فرقة الغربية للفنون الشعبية وعروضها الموسيقية الراقصة، وده غير فرقة المحلة للموسيقى العربية اللي هتكون موجودة علشان تقدم عروض غنائية يوم 30 يناير.

ويوم 31 يناير هتشارك فرقة الحرية للفنون الشعبية بعروضها المختلفة، ويوم 1 فبراير فرقة أسيوط للفنون الشعبية هتقدم فلكلور من التراث الصعيدي، ويوم 2 يناير هيكون ميعاد عرض فني من جنوب مصر هتقدمه فرقة أسوان للفنون الشعبية، وهيكون ختام الحفلات الفنية يوم 3 فبراير مع فرقة الشرقية للفنون الشعبية.

فريق كايرو 360 بيتمنى لكم تستمتعوا بالعروض كلها.

مقترح