The Definitive Guide to Living in the Capital , Cairo , Egypt

أيام بتفصلنا عن أهم حدث ثقافي في مصر والعالم العربي وهو معرض القاهرة الدولي للكتاب، واللي هيكون في مركز مصر للمؤتمرات والمعارض الدولية في القاهرة الجديدة، وهيشارك فيه دور عرض مهمة مصرية وكمان دور عرض عربية من السودان وليبيا وفلسطين والسعودية وسوريا والكويت والامارات وقطر والأردن وغيرهم، تعالوا نعرف تفاصيل المعرض ومواعيده وتذاكر الدخول والتطبيق الإلكتروني الخاص به وأكثر.

معرض القاهرة الدولي للكتاب هيفتح أبوابه للجمهور يوم 25 يناير وهيستمر ليوم 6 فبراير 2024، والافتتاح الرسمي هيكون 24 يناير بدون جمهور، ودي هتكون الدورة الـ55 للمعرض.

وشخصية المعرض السنة دي هي عالم المصريات الشهير سليم حسن، وشخصية معرض الطفل هو الكاتب يعقوب الشاروني، أما الدولة ضيفة الشرف فوقع الاختيار على مملكة النرويج.

في المعرض هتقدروا تشتروا كل الكتب والروايات اللي بتحبوها من دور النشر المختلفة وكمان تحضروا ندوات للكبار والأطفال مجانًا خلال فترة المعرض، وده بخلاف حفلات التوقيع.

مواعيد دخول المعرض هتكون يوميًا من الساعة 10 صباحًا وحتى الساعة 8 مساءً، ويومي الخميس والجمعة هيمتد المعرضة للساعة 9 مساءً، وهيكون سعر تذكرة الدخول يتراوح ما بين 5 و10 جنيهات، وهيكون الحجز أونلاين من خلال موقعهم الإلكتروني من هنا.

وتحت شعار “نصنع المعرفة.. نصون الكلمة” هتشارك أكثر من 1000 دار نشر مصرية السنة دي في المعرض بخلاف عشرات دور النشر العربية واللي حصلت بالفعل على ترخيص بالمشاركة في معرض القاهرة الدولي للكتاب 2024.

وزي كل سنة وزارة النقل هتوفر مواصلات من ميادين مصر الرئيسية إلى معرض الكتاب بسعر مخفض، وكمان هيكون فيه مواصلات عامة من العباسية والمنيب وصلاح سالم ومدينة نصر ومصر الجديدة من وإلى المعرض.

وتقدروا تعرفوا أكتر عن معرض الكتاب من خلال تطبيقهم الإلكتروني، وتقدروا تحملوه لو أنتم من مستخدمي أندرويد من هنا.

أما لو كنتم من مستخدمي نظام iOS فحملوا التطبيق من هنا.

وكمان مستخدمي هواوي يقدروا يحملوا التطبيق من هنا.