The Definitive Guide to Living in the Capital , Cairo , Egypt

الويك إند! يعني خروج وانبساط وسفر. ولو نفسك تخرج من القاهرة في الويك إند وتزور مكان جديد وممتع وفي نفس الوقت قريب من القاهرة، ننصحك تطلع على مدينة كرانيس بمحافظة الفيوم، هناك هتقدر تزور واحد من أجمل متاحف مصر، وهو متحف “كوم أوشيم”، اللي بيحتوي على كنوز مهمة، ومنها بورتريهات الفيوم الشهيرة.

تعالوا نتعرف أكتر على المتحف وكنوزه.

1 – سعر تذكرة متحف “كوم أوشيم” 5 جنيه بس، ومواعيده من 8 صباحًا ولحد 5 مساءً، والمتحف موجود عند مدخل مدينة كرانيس بمحافظة الفيوم.

2 – بيعتبر متحف “كوم أوشيم” واحد من أهم متاحف مصر، وفيه قطع أثرية نادرة، وكنوز المتحف بتحكي تاريخ محافظة الفيوم، وعادات وتقاليد أهلها من أقدم العصور، بالإضافة للفكر الديني اللي اعتنقه أهل المحافظة على مر العصور.

3 – بيتكون المتحف من دورين، وعدد القطع الأثرية المعروضة فيه أكتر من 300 قطعة أثرية من مختلف العصور التاريخية.

4 – من أشهر القطع الأثرية في المتحف بورتريهات الفيوم الشهيرة، بالإضافة لعدد من المومياوات وقطع من البردي.

5 – من أهم اللوحات في المتحف أيقونة يوسف النجار وهى لوحة خشبية عمرها 3 قرون بتزين الطابق العلوي من المتحف وفيها القديس يوسف النجار وهو بيحمل السيد المسيح وهو طفل.