The Definitive Guide to Living in the Capital , Cairo , Egypt

الفن الهادف هو أفضل وسيلة لنشر التسامح في المجتمعات، وحاليًا ظهر في مصر فرق شباب كتير بيحاولوا يقدموا حاجة مميزة ومفيدة للمجتمع من خلال الفن، وبيعتبروه بوابة التغيير في الفكر والعقل والسلوك، ولكن البعض من الفرق دي بتواجه مشكلة وجود مكان للبروفات والاجتماعات والتحضيرات، ومن هنا ظهرت “واحة الفنون”، وهي مساحة فنية بتوفر احتياجات الفن بكل أنواعه، وخلال السطور الجاية هنقول لكم على كل اللي محتاجين تعرفوه عن واحة الفنون.

المكان عبارة عن فيلا 4 أدوار في مصر الجديدة، وتابع لمؤسسة اسمها واحة الفنون للثقافة والتنمية، وهي تحت التأسيس، وهدفهم توفير مساحة لممارسة وتعليم كل أنواع الفنون لكل الأعمار، وهي فيلا مبنية على الطراز المعماري القديم، تقدروا فيها تشتغلوا في أي مكان جواها حسب احتياجاتكم ونشاطكم، وكمان تقدروا تقعدوا في الأوبن إيريا بتاعة الفيلا تجتمعوا أو تفكروا وتاخدوا مشروبكم، والمكان مناسب كمان لو عاوزين تعزفوا أو تقروا كتب من اللي بيوفروها في المكتبة.

المكان بيوفر مكان للبروفات والاستعراضات والرسم والحرف اليدوية، وكمان تقدروا تعملوا ورش عمل خاصة بالتمثيل أو الإخراج وحتى تعليم الهاند ميد هتلاقوا ده متاح، ده غير أن عندهم ركن مخصوص للمذاكرة، يعني تقدروا تقولوا موفرين كل حاجة، والمكان متغطي بالإنترنت علشان اللي بيحتاجوه في شغلهم.

وفيه قاعات داخل واحة الفنون فيها شاشات كبيرة علشان الدورات، وعندهم بلكونة على الجرين إيريا ترد الروح، وبيوفروا ألعاب زي board games  و PlayStation PS4، وعندهم الروف بقى عاملينه على التراث النوبي، وقعدته مختلفة ورايقة، وهتسمعوا أغاني ومزيكا هتعجبكم وسط زرع مختلف، ولو حابين تعملوا عيد ميلاد أو تقعدوا قعدة عائلية في غرف مجهزة لكده، وطبعًا الأكل والشرب بأسعار في متناول الجميع.

أما الأسعار في المكان فتبدأ من 5 جنيه للمشروبات، والورك سبيس الساعة بـ10 جنيه، واليوم كله بـ50 جنيه، ده غير كمان أنهم عاملين اشتراكات شهرية مخفضة.

تقدروا تزوروا واحة الفنون في.. ١٩ شارع الجيزة، متفرع من شارع بيروت، مصر الجديدة.

وتقدروا تعرفوا أكتر عنهم من خلال صفحة الفيسبوك من هنا.