وجوه الفيوم.. الحكاية التاريخية لأقدم لوحات تمثل فن “البورتريه” في العالم
آثار مصرية الفن المصري القديم بورتريهات الفيوم مصر وجوه الفيوم
Cairo 360
لما هتبص على وجوه الفيوم، هتحس بدهشة وانبهار، ملامح واقعية، دقة عجيبة، وكأنها صور فوتوغرافية بعتها لنا التاريخ علشان نشوف وجوه ناس شبهنا عاشوا زمان على أرض مصر، وهي لوحات واقعية لشخصيات رسمت على توابيت مومياوات مصرية في الفيوم خلال الحقبة الرومانية.
وجوه الفيوم اللي وصفت عالميًا بأنها أقدم لوحات بتمثل فن “البورتريه” في العالم بتُعد هي شكل جديد وغير مألوف وبتختلف بشكل كامل عن طابع الفن المصري القديم، وبترجه الوجوه إلى العصر الروماني وكانت مرسومة على لوحات خشبية بشكل كلاسيكي خلاها من أجمل الرسومات في فن الرسم الكلاسيكي العالمي، وبتعتبر نموذج متفرد في العالم، ونقدر نقول إنها بداية لأنواع متعددة من الفنون انتشرت في العالم زي الفن البيزنطي وفن الأيقونات القبطي في مصر.
ووصف الفيلسوف والروائي الفرنسي “أندرية مالرو” البورتريهات بأنها “وجوه تتطلع إلى الحياة الأبدية”، وأنها بتمثل منطقة وسط بين الحياة والموت.
أغلب البورتريهات دي عُثر عليها في منطقة الفيوم، وعلشان كدة حملت اسم وجوه الفيوم، رغم أن بعضها عُثر عليه في مناطق ثانية متفرقة.
وبيعد عالم المصريات البريطاني “فلندرز بتري” أكثر شخص اهتم بالتنقيب عن الوجوه دي، ففي عام 1887 قدر يلاقي 81 بورتريه في واحدة من المقابر الرومانية، وفي عام 1910 لقى 70 بورتريه ثانيين وبكدة وصل مجموع اللوحات اللي اكتشفها إلى 151 لوحة.
لحد اللحظة دي، مافيش تأكيد علمي إن كانت الوجوه دي رُسمت بعد وفاة أصحابها علشان تكون على توابيتهم ولا رُسمت في حياتهم وكانوا بيحتفظوا بها معلقة على جدران بيوتهم وبعدها وضعت على التوابيت بعد الوفاة، لأن معظمها وجد مع التوابيت، لكن القليل منها وجد دون العثور على تابوت للشخص، وده بيدعم الفرضية الثانية.
ولحد النهارده تم اكتشاف حوالي 900 لوحة في المقابر التاريخية بالفيوم، وبسبب المناخ الجاف والحار للمنطقة احتفظت اللوحات بشكلها بشكل ممتاز، لدرجة أنك هتحس إن بعض ألوانها لسة جديدة!
وبتميل الرسوم إلى الفن الإغريقي الروماني بشكل أكبر مما هو معروف عن فن الرسم المصري القديم، لأن المصريين تأثروا بأسلوب الفن دي خلال الفترة دي بسبب وجود الرومان على أرض مصر وقتها.
تشوفوا فين بورتريهات الفيوم؟
للأسف بورتريهات الفيوم مش موجودة حاليًا على أرض مصر وبس، هتلاقوا منها في متاحف عالمية من بينها المتحف البريطاني في لندن، لكن تقدروا تشوفوا بعضها في المتحف المصري بالتحرير.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
