وساويس شو: كوكو وشوشو في معركة رمضانية
Muhammad Nasr
معركة الخير والشر دائمًا كانت لها مكانة كبيرة في كل أشكال الأفلام والمسلسلات من أول التراجيدي للدراما للكوميديا، المعركة اتجسدت في أفلام ومسلسلات ومسرحيات خلال فترات السينما والدراما والمسارح المصرية من أيام الأبيض والأسود لغاية الـ Full HDوالـ 4K، خلال رمضان 2016 شوفنا معركة الخير والشر في مسلسل ونوس من بطولة يحيي الفخراني، كمان هنشوف معركة جديدة بدم خفيف على الإنترنت من خلال برنامجنا النهارده "وساويس شو" بطولة شوشو وكوكو من تقديم باطرو بابيتس.
باطرو بابيتس لمؤسستها سارة البطراوي اللي بنعتبرها واحدة من أهم الناس المبدعة في مجال تحريك وصناعة العرائس في مصر ولها عدد من المشاريع المهمة اللي بتتعرض في القاهرة وفي مصر كلها، كمان ممكن تعمل عروسة خاصة بالشكل اللي تحبوه سواء Look alike أو شكل جديد أو شخصية مشهورة.
من كام يوم اتفاجئنا أن صفحة باطرو بابيتس اللوجو بتاعها اتغير لشكل شيطاني غريب كده وصورة الـ Cover اتغيرت لجملة "الهاك علينا حق #سفير جهنم"، في الفترة الأخيرة مع محاولات الاختراق وانخفاض مستوى الأمان في الفيسبوك بقينا نشوف ده كثير، كنا متضايقين من ده بس الغريب أن المخترق (على حسب ما شايفين) كان دمه خفيف قوي وبدأ يكتب لسارة: "بقولك إيه يا سارة .. أنا ساكت ومش عايز اتكلم أنا بحذرك لو #كوكو ظهرت هنا تاني هعمل حاجات مش هتعجبك خالص.. ولقد أعذر من بنزر!!" كوكو هي من عرائس باطرو وكانت مميزة بضحكتها الجميلة ودمها الخفيف. يبقى هو مشكلته مع كوكو.
"يا تلحقى اللى إدلق.. بدل ما اعمل قلق وتجيبلي اللى اتسرق.. واتقي شر الحليم إذا اتفلق وعجبي #ربعيات_كهين #سفير_جهنم" وعامل Check in في Hell Lounge ، خفة دم وكلام يوقع من الضحك. ايه حكاية سفير جهنم ده بقى.
بدأت سارة ترد على الحرب مع سفير جهنم وتحاول توصل معه لاتفاق وسط، لغاية ما وصلوا أن كوكو وشوشو هيطلعوا مع بعض في رمضان في معركة الخير والشر في برنامج "وساويس شو".
بدأت حلقات "وساويس شو" كل حلقة بيظهر شوشو (الشر الفقري) أو كوكو (الضحكة الجميلة) ويتكلموا عن درس جديد أو موضوع جديد في حياتنا، طبعًا شوشو على طول بيوسوس لأي حد بالشر والسلبية، أما كوكو بتتكلم عن الخير وإزاي الواحد يكون إيجابي في الشهر الكريم، معركة جديدة بين الخير والشر تستحق تأخذ من وقتكم شوية هترسم على وجوهكم ابتسامة، وخصوصًا أصحابنا من السن الصغير اللي بقوا يتابعوا وينتظروا حلقات وساويس شو.
نتمنى أن فنانين تحريك العرائس يفاجئونا بحاجة خلال الفترة القادمة بحاجة من إبداعهم زي إبداع الخالد رحمي – "بوجي وطمطم"، أكيد فيه حاجات عظيمة زي مسرح الساقية للعرائس بس البحر يحب الزيادة.
تابعوا حلقات وساويس شو على صفحة باطرو بابيتس على الفيسبوك.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
