“ومن العشق ما بنى”.. 3 أماكن في القاهرة بطعم الحب
حكايات أماكن القاهرة متاحف رومانسية في القاهرة متاحف في القاهرة متحف أم كلثوم متحف محمد محمود خليل وحرمه متحف نجيب محفوظ
Cairo 360
عمر مراد
للأماكن في القاهرة حكايات مثيرة! لكن تظل أجمل الحكايات دي هي اللي بتعرفنا السبب الحقيقي لبناء مكان معين. فيه أماكن مميزة في القاهرة، بُنيت بأمر الحب، والهدف من البناء هو توثيق قصص حب مميزة ومختلفة، وعلى مر السنين، فضلت الأماكن دي دليل واضح على أن “ومن العشق ما بنى”!
تعالوا نتعرف على 3 أماكن في القاهرة مش هينفع تشوفهم بعينك وبس.. هتحتاج تشوفهم كمان بقلبك!
متحف محمود خليل وحرمه.. حين اجتمع حبيبان على عشق الفن!
المتحف باختصار هو قصة حب بطعم الفن! بيعود للفنان محمد محمود خليل وحرمه، واللي كان معروف عنهم حبهم الشديد للفن والتحف والأنتيكات. كل تحفة وقطعة في المتحف جمعوها سوا من أماكن مختلفة في العالم. يعني كل قطعة هتشوفوها في المتحف هي قصة حب في حد ذاتها. روحوا المتحف واستمتعوا بتحف الحب.
العنوان: 1 شارع كارفور، من شارل ديجول، بجوار مجلس الدولة، الدقي.
متحف أم كلثوم.. هل رأى الحب سكارى؟
دائمًا أول ما بنسمع اسم أم كلثوم بنحس بالحب، وعشقها للفن والغناء كان سبب في ارتباطها بالعود وغيره من الأدوات الموسيقية الجميلة الموجودة حاليًا في المتحف اللي بيحمل اسمها في حي المنيل.
المتحف بيبين درجة عشق السيدة دي للفن والإبداع، ومن شدة حب المصريين لها قررت الدولة إنها تعمل متحف بيضم كل حاجة متعلقة بالست زي الآلات الموسيقية اللي كانت في بيتها، والنوتات الموسيقية، والموسيقى اللي كانت بتحب تسمعها، وصور نادرة من كواليس حفلاتها، وغيرها. روحوا المتحف واستمتعوا بسيرة الحب.
العنوان: 1 شارع الملك الصالح، داخل قصر المانسترلي، منيل الروضة.
متحف نجيب محفوظ.. عشق القاهرة القديمة!
المتحف بيعود للكاتب والأديب الكبير نجيب محفوظ، وبيوثق لعشق أديب نوبل للأدب، وللقاهرة القديمة، ولحارات بلدنا ومشربياتها. الحقيقة إن كل عنصر في المتحف بيبن قد إيه نجيب محفوظ كان بيعشق القاهرة، بتاعة زمان!
المتحف بيعبر كمان عن الحب الكبير بين “محفوظ” وعائلته، وده كان سبب أساسي في إن بنته تتبرع بكل حاجة تخص نجيب محفوظ للدولة، اللي قامت بدورها بتجهيز المتحف علشان يستقبل كل عشاق “محفوظ”.
العنوان: بجوار جامع الأزهر، أمام وكالة الغوري، الدرب الأحمر.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
