The Definitive Guide to Living in the Capital , Cairo , Egypt

الصور: صفحة التهامي على فيسبوك

الإنشاد الديني خد أكتر من شكل وطابع على مر السنين وبمرور الوقت بقى فيه نوع من الإنشاد بيتميز بطبعه الصوفي لأنه بيكون فيه قصائد في حب الله ورسوله خاصة، وهنا تميز الشيخ ياسين التهامي.

من قرية الحواتكة بمركز منفلوط بمحافظة أسيوط بالصعيد اتولد المنشد الصعيدي المعروف الشيخ ياسين التهامي في 6 ديسمبر عام 1949م. كان أغلب الناس في القرية منتسبين للطرق الصوفية، ده غير أن والده كان من الصالحين وده ساعده أكتر أنه يحفظ القرآن ويتعلم في المعاهد الأزهرية لحد ثانية ثانوي وبعد كده اختار طريق الإنشاد.

حياة الشيخ ياسين وسط مجتمع أغلبه احتفالات بالموالد وذكر، ساعده أنه يتعرف على الشعر الصوفي زي أشعار  “عمر بن الفارض” و”منصور الحلاج” و”محيي الدين بن عربي” وغيرهم، وده أكتر حاجات ساعدته أنه يكرس حياته أنه يبقى منشد.

كمان الشيخ التهامي سافر وأنشد في أكثر من دولة أوروبية وخد جوائز كتير، وبدأ يشتهر من منتصف السبعينيات كمنشد ديني متمكن وبقى بينافس  الشيخ أحمد التوني واللي كان يعتبر ملك اللون ده من الفن في الوقت ده، وبعد كده فضل الشيخ ياسين على مستواه البديع ويعتبر أفضل المنشدين الصوفيين في مصر والعالم.

ده غير أن  الشيخ ياسين قدر يغير ويرفع الإنشاد الديني الشعبي من الأسلوب المعتاد والكلمات العامية ويخليه مليان بقصائد شعر فصيحة صوفية ده غير أنه عنده علم كبير بالموسيقى وده خلى إيقاعه مرن وسلس جدًا بين المقامات.

تقدروا تشوفوا القناة الخاصة بالشيخ ياسين التهامي على اليوتيوب من هنا.