The Definitive Guide to Living in the Capital , Cairo , Egypt

في وقت بقى فيه خبر الحروب صوته أعلى من أخبار الفرح، وصور الدمار بقت بتتزاحم على شاشات الموبايل مستنيانا قبل حتى ما نصحى من النوم، كان المصور أحمد مصطفى بيدور على زاوية تانية للحكاية.

في فبراير 2026، قرر “أحمد” يسافر جنوب مصر، مش علشان يهرب من الواقع، لكن علشان يفهمه من حتة أهدى. من حتة لسه فيها ناس بتخبز، وبتغني، وبتحب الخيل وطقوسها، وبتصطاد، وبترسم.

عدسته ما كانتش رايحة تدور على لقطة استثنائية بقدر ما كانت عاوزة تمسك تفاصيل الحياة العادية.. اللي إحنا غالبًا بنعدي عليها من غير ما ناخد بالنا.

كاميرا “أحمد” شافت سيدة جالسة قدام فرن طيني، بتخبز العيش الشمسي. الفرن في قلبه نار وبتزينه رسوم قبطية، والعجين على إيديها، والملامح هادية كأنها بتكرر طقس قديم محفوظ من أيام قدماء المصريين. الصورة دي مش بس عن خبز… دي عن استمرارية الحياة.

فيه صورة تانية، رجال من الصعيد بيعبروا عن عشقهم للخيل، بطريقتهم الخاصة. الغبار كأنه دخان، والعيون مركزة، والحماس مالي الجو.. مش مجرد سباق.. ده استعراض فخر، وتراث، وشهامة وقوة.

واحد تاني قاعد بهدوء بيرسم رسومات مستوحاة من مصر القديمة على آنية فخار.. كأن الزمن بيرجع تاني.. الفن هنا مش ديكور.. ده محاولة لحفظ الحكاية.

فرقة موسيقى شعبية بالطبل البلدي، بتقدم إيقاع صريح ومباشر، يخليك تحس إن الأرض نفسها بتفرح معاهم.. الناس حواليهم مش جمهور وبس، دي حالة مشاركة.

ومراكبي واقف في نص النيل، بيرمي الشبكة، في مشهد بسيط جدًا، لكنه مليان كرامة. رزق يوم بيبدأ من حركة إيد صادقة.

أحمد مصطفى بيقول إنه كان عاوز يقرب من العوالم اللي الكاميرات الإخبارية ما بتوصلهاش. الأماكن اللي مش بتتصدر العناوين أو التريند، لكنها لسه بتنبض.

ما يفوتكش كمان: رحلة لسوق برقاش.. عالم الجمال اللي بيحكي حكاية مصر القديمة (صور)

الصور دي مش بتقدم جنوب مصر كفلكلور سياحي، ولا كمشهد نوستالجيا مصطنعة، لكن كحياة حقيقية.. فيها حب، وتجانس، وإيمان بالإنسان.

يمكن أهم حاجة في الرحلة دي إنها بتفكرك إن الصورة مش دايمًا بتغير العالم.. لكنها قادرة تغير نظرتك أنت له.