The Definitive Guide to Living in the Capital , Cairo , Egypt

الصورة الرئيسية: يحيى العلايلي

في قلب الدرب الأحمر، جوه الشوارع اللي لسه بتحافظ على روح القاهرة القديمة، بيت يكن أعلن عن إطلاق مهرجان التراث والفنون 2025.. احتفالية كبيرة مدتها أربع أيام من 11 لـ14 ديسمبر، والهدف منها تقديم إبداع أهالي المنطقة وتسليط الضوء على تراثهم اللي طول عمره جزء أصيل من جمال القاهرة.

المهرجان بيبدأ يوم الخميس 11 ديسمبر بمعرض فني من 6 لـ9 بالليل، واللي هيكمل عرضه لحد يوم الأحد. المعرض بيشارك فيه 40 فنان من الستات والأطفال من الدرب الأحمر.. لوحات، قطع فنية، وشغل بإيد الناس اللي الفن جزء من حياتها اليومية. وكل الأعمال معروضة للبيع دعمًا للمشاركين وتشجيعًا للإبداع المحلي.

وخلال يومي 12 و13 ديسمبر، من 11 الصبح لـ4 العصر، هيتم تقديم ورش فنية متخصصة في التطعيم على الخشب، والرسم على الخزف، والتطريز.. ورش مناسبة لأي حد نفسه يجرّب، يتعلم، أو يعيش تجربة جديدة وسط أجواء تراثية جميلة. والاشتراك بيكون من خلال الحجز مسبقًا على صفحة بيت يكن على فيسبوك.

الفعالية دي مش مجرد مهرجان.. هي جزء من مشروع كبير بدأه بيت يكن من سنين لإحياء الحرف التقليدية وتعليمها لجيل جديد. المبنى نفسه قصر من القرن الـ19، متشبع بحكايات ناس عاشوا ومرّوا من هنا. النهارده بقى مساحة للورش، الفن، والمجتمع.. ومكان بيجمع بين الماضي والحاضر بروح واحدة.

معلومات عن بيت يكن

في قلب حي الدرب الأحمر التاريخي بالقاهرة، بتتنفس الجدران حكايات الماضي، البيت في الأصل قصر مُرمم بيعود للقرن الـ19، اتحول في السنوات الأخيرة لمنارة لإحياء التراث. بين جدرانه العريقة، شبان وشابات من أبناء المنطقة بيحضروا ورش عمل مليانة فن وحياة، هدفها إعادة إحياء الحرف التقليدية اللي قربت تختفي! وربط جيل جديد بجذور هويته الثقافية.

لو بتحبوا الفنون، الحرف، التراث، أو حتى أماكن القاهرة اللي ليها روح.. مهرجان بيت يكن هيكون تجربة تستحق الزيارة.