O Story: دروس باليه للبنات وبس في المقطم
Nagla Ashraf
كل طفل بتكون له أحلامه الخاصة أنه يكبر ويوصل لأهدافه الكبيرة والصغيرة، زي مثلًا أنه يكون مهندس أو ظابط، أو أميرة صغيرة سعيدة بفستانها، ومع الوقت الحياة بتاخدهم وممكن ينسوا الحلم القديم ويلاقوا نفسهم في مكان تاني خالص. فجأة بعد ما بيكبروا بيكتشفوا أن كان فيه حاجات نفسهم يعملوها بس خلاص الوقت فات علشان كبروا… بس الحقيقة أن عمر الوقت ما بيفوت، ومهما الوقت يعدي ممكن يحققوا حلم الطفولة، ومن أحلام الطفولة دي لناس كتير أنهم يتعلموا يرقصوا باليه من تاني، برغم كبر السن والوزن الزيادة وانشغال الحياة. وده اللي بيقدموا “O Story”. واللي بيوفر دروس باليه للبنات من كل الأعمار وكل العاملات فيه من النساء، وده بيخليه مناسب لأي بنوتة مصرية سواء محجبة أو منتقبة.
المكان في المقطم بيقدم لكل متدربة 3 شهور دروس باليه مرة أو مرتين في الأسبوع على حسب إختيارك وبعد الثلاث شهور بيكون فيه حفلة بيقدمها المتدربات وبيحصلوا على شهادة معتمدة من المدربة. برضه لو عاوزين تدرسوا شهر بشهر مافيش مشكلة بس مش هيكون فيه شهادة أو حفلة.
كمان فيه تجربة لذيذة جدًا وهي أنه بيتم تدريب الأطفال مع أمهاتهم، ودي هتكون تجربة لطيفة جدًا للطرفين. أما بالنسبة لأسعار فهي معقولة جدًا الـ 3 أشهر مرة واحدة في الأسبوع بـ 750 جنيه، والشهر الواحد بـ 350 جنيه. ده غير حذاء الباليه اللي ممكن تشتريه من هناك، وكمان تقدروا تشتروا من هناك الـ Skirt الخاصة بالباليه واللي بتكون منفوشة وألوانها مبهجة.
وممكن تشوف فيديو عن المكان من هنا.
أما لو عاوزين تعرفوا عن التجربة نفسها، فإحنا كمحررين كايرو_360 حبينا نخوض التجربة دي ونجرب يوم هناك ودي بالمناسبة حاجة متاحة للجميع، والإحساس كان لا يوصف كأنك دخلت عامل تاني من الجمال والسحر، مش بس علشان إحساس الخفة والإنسايبية، لا كمان المدربة بتاخد المتدربين خطوة خطوة من أول التسخين لحد ما تبدأ تتدربوا على عرض بحيرة البجع، الموضوع مش مجهد خالص إلا لو عندكم مشاكل في عضمكم أو خشونة.
وبالمناسبة هم كمان بيوفوا دروس باليه للحوامل واللي محتاجين يتعالجوا علاج طبيعي وبيكون مع المدربة دكتورة علاج طبيعة والـ class اسمه “Healing Ballet”.
كمان المكان متوفر فيه ركن علشان الأطفال تلعب فيه أو تنتظر مامتهم، وفيه كافيتريا صغيرة للي محتاج ياكل وجبة خفيفة أو يشرب حاجة سخنة.
التجربة ممتعة جدًا لو عاوزين تعرفوا أكثر عن المكان وتفاصيله شوفوا صفحتهم على الفيسبوك هنا.
