The Definitive Guide to Living in the Capital , Cairo , Egypt

أسامة الرفاعي، فنان مصري مهتم بالتصميم الرقمي، أنجز مؤخرًا مشروع فني مختلف، أضاف من خلاله لشوارع وحواري القاهرة لمسة فنية مشهورة في الأحياء اليابانية وهي إعلانات النيون، وحقق مشروع “الرفاعي” رد فعل إيجابي على وسائل التواصل الاجتماعي، وكتب عنه مؤخرًا الموقع العربي لشبكة “سي إن إن” الأمريكية.

في مشروعه الفني اللي بيحمل عنوان “Transition” بيتخيل الفنان أسامة الرفاعي أحياء القاهرة القديمة وكأنها شوارع في أحياء طوكيو باليابان، اللي بتتميز بإعلانات النيون.

وقال “الرفاعي” في حواره مع موقع CNN بالعربية، إن فكرة مشروعه جت بمحض الصدفة، لما كان بيتدرّب على استخدام برنامج التصميم “بلندر” بشكل أكثر احترافية.

وبيشرح “الرفاعي” مشروعه أكتر وبيقول: “في البداية حاولت تقديم تخيل رقمي جديد للشوارع القديمة في مصر، والشبيهة بالمنطقة اللي بعيش فيها، واللي بتتمتع بعناصر وجماليات مش موجودة في أي مكان تاني”.

وخلال فترة عمله على المشروع، خطرت للرفاعي فكرة إضافة عناصر تدي للمكان بُعد درامي، كأن فيه قصة أو أحداث بتدور في المكان، لكن من غير ما يلغي المعالم القديمة من الشارع، وهنا قرر إضافة إعلانات النيون للمشروع وأطلق عليه عنوان  “Transition”.

وبيوضح الرفاعي أن إعلانات النيون اللي بتظهر في الصور اللي صممها، رغم أنها بتظهر فيها كتابات باللغة العربية، إلا أن شكلها العام متأثر بإعلانات النيون الموجودة في ضواحي طوكيو في اليابان.

تقدروا تتفرجوا على كل صور المشروع وتتابعوا شغل أسامة الرفاعي من خلال حسابه الرسمي على إنستجرام من هنا.