The Definitive Guide to Living in the Capital , Cairo , Egypt

العيد مايكملش إلا بخروجة حلوة مع الأصحاب سواء بعد الصلاة أو تاني أو تالت يوم العيد، وعلشان الخروجة تكمل يبقى لازم تروح مكان بيقدم مشروبات حلوة وأطباق مميزة وده اللي اخترناه ليكم علشان تقضوا أجازة عيد لطيفة.

بول – Paul

بول من الأماكن اللي بتجمع ما بين الأكل الحلو المعمول بمزاج والقهوة اللي تظبط دماغك، ده غير إن المخبوزات عندهم حكاية، يعني ينفع جدًا لفطار أول يوم العيد أو خروجة خفيفة مع الأصحاب. أجمل حاجة إن كل طبق معمول بحرفية وعناية فأكيد مش هتندم أنك تروحوه. العنوان هنا.

تروفا – Troufa

من أرقى الأماكن اللي بتعمل حلويات بطريقة مبتكرة، يعني مش بس قعدة مميزة لكن كمان أصناف حلو تجنن، تبقى محتار تختار منها إيه ولا إيه. العنوان هنا.

قهوة وردة – Khawet warda

مكان لطيف في المهندسين بيجمع بين الديكورات الشرقية والقعدة الخفيفة اللي تستمتع فيها بعصائر ومشروبات سخنة، وكمان ممكن تطلب ساندوتش في السريع أو فطير وجبنة. العنوان هنا.

بليز – Blaze

قعدة حلوة ومشروبات وأطباق مميزة في مول بوينت 90 في التجمع، علشان تطلب طبق يظبط مودك سواء حلو أو حادق، ومشروب مختلف. العنوان هنا.

دانكن دونتس – Dunkin Donuts

يعني الدلع والقهوة واللاتيه المميز، مكان ينفع تاخد منه اللي طلبته وتقعد في عربيتك أو تقعد جوه مع أصحابك، أحسن حاجة فيه أن الطلب مش بيتأخر خالص مسافة ما بتطلب بتستلم طلبك، تختار نوع الدوناتس بتاعتك أو البراونيز والقهوة وتقعد قعدتك بمزاجك. العنوان هنا.

هاوس أوف كوكو – House Of Cocoa

سواء في فرع الكوربة أو المعادي، المكان ده أثبت أنه مصدر للبهجة والسعادة، كأنك داخل جوه مملكة للشوكولاتة السويسرية اللذيذة، ما نقدرش نرشح طبق معين أو حتى مشروب معين لأن كل حاجة عندهم حلوة. العنوان هنا.

بوكا – Bocca

دلع نفسك شوية مع بوكا وأطباق مميزة وقعدة لطيفة، لكن ماتنساش إن أهم حاجة إن طلباتك بتتقدم لك بعناية وحب. العنوان هنا.

جابيز – Gaby’s

أطباق فخيمة جدًا متقدمة بإتقان شديد وحلويات مغرية بيقدمها جابيز بمنتهى الحرفية. ماجربناش حاجة عنده ماعجبتناش، أكيد هتستمتعوا بقعدكتم هنا. العنوان هنا.

جيلاتو ميو – Gelato Mio

مملكة الآيس كريم والطعم الأصلي في المكان ده، بمجرد ما تختار نوعك المفضل هتاخده في الحال وتستمتع بطعم منعش يحسسك بجو العيد خاصة إن طعم الآيس كريم عندهم حكاية ما بتنتهيش وممكن تاخده وتكمل مشي في الزمالك على النيل وتنسى الدنيا. العنوان هنا.

ماندرين قويدر – Mandarine Koueider

سواء نفسك في غداء أو مجرد حلو أو حتى آيس كريم، ماندرين كويدر وفر لك كل ده في مكان واحد بس، ومش عاوزين نتكلم عن جودة أطباقهم بس الأكيد إنك هتاكل صوابعك ورا الأكل. العنوان هنا.