The Definitive Guide to Living in the Capital , Cairo , Egypt

كافيهات

اختيارات كايرو 360: أساتذة الآيس كريم في القاهرة لسنة 2022

أفضل محلات آيس كريم في القاهرة افضل الأماكن في القاهرة جوائز اختيارات محرري كايرو 360 محلات آيس كريم
اختيارات كايرو 360: أساتذة الآيس كريم في القاهرة لسنة 2022
بواسطة
Cairo 360

الآيس كريم هو تقريبًا الأكلة الوحيدة اللي عندها القدرة تبسطك في أي وقت، سواء في الصيف أو في الشتاء، الآيس كريم تحسه شبه بابا نويل، صانع البهجة، ومفجر المفاجآت، وطعمه عبارة عن فرقعة فرفشة.

صحيح أماكن بيع الآيس كريم في كل مكان، إلا إن مش أي حد بيقدر يظبطه صح، وبيحتاج معلم يعمله تمام، وعلشان كده كان لازم نرشح لكم أفضل محلات بتعمل الآيس كريم بمعلمة في القاهرة.

الفائزين في فئة أفضل أماكن الآيس كريم في جوائز اختيارت محرري كايرو 360 لسنة 2022 هم:

 

ماندرين كويدر  – Mandarine Koueidar:

أشهر من نار على علم زي ما بيتقال، وبيعتبر واحد من الأماكن القليلة اللي لسه محافظة على مستواها سواء في الطعم أو في الجودة أو في الخدمة، أما بالنسبة لطعم الآيس كريم عندهم فهو منعش إلى أقصى حد، وتحس إنه معمول فريش، وده لإنهم خبرة في صناعة الآيس كريم من زمان، ومن أوائل الناس اللي قدمته في القاهرة.

 

 

سكيب أند سكوب – Skip and Scoop:

جربت الكوكيز بالآيس كريم قبل كده؟! طاب اسمع مني وروح جرب الاختراع العظيم ده عند “سكيب أند سكوب” في الشيخ زايد، اختار الكوكيز، اختار نكهة الآيس كريم المفضلة بالنسبة لك، واضرب أحلى آيس كريم سندوتش.

 

فاريجاتو – Variegato:

تحفة فنية مليانة بصوص الكراميل المملح، وحقيقي الناس اللي بتحب الافتكاسات هتنبسط من المكان ده.. عندهم منيو غريبة ومليانة أصناف متنوعة وجديدة، جمب الآيس كريم التقليدي الطبيعي بتاعنا، واللي بالمناسبة طعمه مختلف برده في “فاريجاتو”.

 

سلطانة – Sultana:

واحد من أقدم الأماكن اللي بتبيع آيس كريم في مصر، وقديم هنا يعني خبرة، وعلشان كده هتلاقيه في أماكن كتير حواليك في القاهرة، ده غير إنه عنده مجموعة كبيرة من النكهات والإضافات اللي تحب تضيفها على الآيس كريم الخاص بك.

 

جيلاتو ميو – Gelato Mio:

الطعم جامد كده كده، لكن المهم كمان هو الديكورات، والقعدة الحلوة، والاستف الراقي، والخدمة الممتازة، والانتشار في أماكن كتير في القاهرة، يعني هتلاقيهم في المعادي ومصر الجديدة والزمالك والشيخ زايد.. ودوق من “جيلاتو ميو” أحلى آيس كريم إيطالي على أصوله.

 

سنو – Sno:

آيس كريم بطعم الشوكلاته بالنعناع، أو بطعم الحلاوة الطحينية بالفستق، دول طعمين لازم تجربوهم من مجموعة كبيرة من الأطعمة المفتكسه اللي بيقدمها المكان، وحقيقي كانت تجربتنا في المكان مبهجة جدًا، خصوصًا فرع المعادي.

مقترح