The Definitive Guide to Living in the Capital , Cairo , Egypt

كافيهات

جوائز اختيارات المحررين لأفضل أماكن الآيس كريم لعام 2015

جوائز اختيارات المحررين لأفضل أماكن الآيس كريم لعام 2015
بواسطة
Cairo 360

من زمان ومنتجات الألبان والآيس كريم منتشرين تقريبًا في كل ثلاجات محلات البقالة والسوبر ماركت في القاهرة، وكان عادي جدًا أن الواحد يقتنع بالأربع خمس أنواع الموجودين عند البقال أو حتى عند المحلات المتخصصة في بيع منتجات الألبان، واللي ما بـ تختلفش من مكان للثاني؛ آخرنا كان فراولة، ومانجو، وفانيليا وشوكولاتة… ولو أصحاب مزاج عالي نختار آيس كريم المستكة.

لكن الأيام دي انتهيت تمامًا بعدما ظهرت مجموعة كبيرة من المحلات المتخصصة في بيع الآيس كريم وبس، واللي بظهورها ظهر لنا عالم كبير من الأنواع المختلفة والمبتكرة اللي بـ تناسب أي ذوق، من ضمن العدد الكبير ده اختارنا لكم الأماكن اللي فعلًا تعتمد عليها لما يبقى نفسك في آيس كريم في أي وقت.

الأماكن الفائزة بجوائز اختيارات المحررين لعام 2015 لأفضل أماكن الآيس كريم:

 

جيلاتو ميو – Gelato Mio:

حتى الآن مش قادرين ننسى أول مرة جربنا فيها جيلاتو ميو، لأنها كانت تجربة عظيمة، أحسن حاجة ممكن تجربها هناك هي السوربيهات بأنواعها المختلفة، لأنها فريش ومنعشة، مش بس كده، جيلاتو ميو عنده مجموعة من الأنواع المبتكرة والغريبة اللي لازم تتجرب لأن من حلاوتها ممكن تبقى النوع المفضل لك، من الأنواع دي آيس كريم الجبنة الريكوتا بقطع التين.

 

ريجولتو – Rigoletto:

ريجولتو يعتبر من أقدم الأماكن اللي تخصصت في الآيس كريم والحلويات اللي بـ يلعب الآيس كريم فيها دور أساسي.. وقدر خلال السنين اللي فاتوا أنه يحافظ على جودة منتجاته ونجاحه، لدرجة أن بقى له كلاسيكيات خاصة به ما تأكلهاش غير عنده، زي التشيز كيك، آيس كريم البترسكوتش ومجموعة كبيرة من تورتات الآيس كريم اللي هـ تلاقيها موجودة كتحلية خفيفة في أي عزومة.  

 

سكوبس – : Scoops

سكوبس مش بس بـ يقدم مجموعة متنوعة ومبتكرة من نكهات الآيس كريم، ده كمان بـ يقدم أنواع مختلفة من الزبادي المثلج. الابتكار عند سكوبس ما توقفش عند نكهات الآيس كريم وبس، ده كمان طريقة التقديم عندهم مختلفة زي "جيلاتو بوبس" اللي على شكل مصاصات، وأًصيص الزرع اللي موضوع فيها خليط من نكهات مختلفة.

 

بينك بيري – Pinkberry:

بالرغم من أن فيه عدد كبير من الأماكن اللي بـ تقدم الزبادي المثلج، إلا أن بينك بيري من أحسن الأماكن اللي بـ تقدمه، بمجموعة كبيرة من النكهات والإضافات اللانهائية، سهل جدًا أنك تلاقي تركيبتك المفضلة بين الاختيارات الكثيرة واللي مش هـ تلاقي مكان بـ يقدمها فريش زي بينك بيري.

 

تي سي بي واي – TCBY:

بالنسبة لنا تجربة أننا نختار مكونات الزبادي المثلج من الألف للياء هي أجمل حاجة، تي سي بي واي بـ يختلف عن الأماكن الثانية اللي بـ تقدم الزبادي المثلج بأنه بـ يستخدم منتجات عضوية وصحية تخليك بـ تأكل وأنت مطمئن، ومن غير ما تحس بالذنب.

 

تشيري أون توب – Cherry on Top:  

تشيري أون توب من الأماكن اللي مش بس بـ تقدم مجموعة  كبيرة من الاختيارات للزبادي المثلج، ده كمان عندهم مجموعة متنوعة من الحلويات الثانية زي الكب كيك، والكوكيز والسينامون رولز. يعني من الآخر اللي نفسك فيه هـ تلاقيه في تشيري أون توب.

 

يوجيز – Yoggy’s:

يوجيز بـ يقدم لمحبي الزبادي المثلج تجربة خاصة جدًا مش هـ تلاقيها في أي مكان ثاني؛ لأنهم مش هـ يقفوا يطلبوا نوعهم المفضل بالمكونات اللي عاوزينها من القائم على خدمة البيع وخلاص زي في أي مكان ثاني؛ دول هـ يعملوا كل حاجة بنفسهم من أول ملء الكوب من ماكينة الزبادي وحتى الإضافات الموجودة في بار ضخم زي بار السلاطات اللي بـ يبقى موجود في المطاعم.

 

ستافولتا – Stavolta:

المقر الرسمي لكل محبي الآيس كريم في المعادي، لأنه ببساطة بـ يقدم آيس كريم مختلف تمامًا عن أي مكان ثاني، الآيس كريم في ستافولتا مشهور بأن مكوناته فريش وغنية بالنكهات كأنه معمول في البيت.. غير كده، ستافولتا كل فترة بـ يقدم نكهات جديدة.

 

كارفل  – Carvel:

يمكن كارفل نكهاته محدودة بالنسبة لأماكن كثيرة، ولكن بـ يعوض ده بميزة مش موجودة في أي مكان ثاني، وهي أن حجم البولة كبير وده شيء أي شخص بـ يحب الآيس كريم هـ يقدره، وخصوصًا لما يكون الآيس كريم نفسه طعمه رائع ومختلف، كارفل مالهوش منافس حتى الآن في آيس كريم زبدة الفول السوداني بقطع الشوكولاتة.

مقترح