The Definitive Guide to Living in the Capital , Cairo , Egypt

 

مافيش أجمل من أنك تستمتع بقطعة براونيز أو كب كيك تخرجك من مود الزحمة وروتين الشغل وتستمتع بقطعة شوكولاتة تفصلك عن العالم، ومع زيادة عدد محلات الحلويات والمخبوزات في القاهرة، فيه محلات قليلة قدرت تثبت وجودها وتجذب زبائنها بحرفيتها وجودة منتجاتها.

الفائزين في فئة أفضل أماكن الحلويات والمخبوزات في جوائز اختيارت محرري كايرو 360 لعام 2017:

برو أند شو – Brew and Chew

بدأ أول فرع له في إسكندرية وسمعته الممتازة واجتهاد أصحابه خلوه يقدر يفتح فرع تاني في القاهرة، وبرغم أنه عنده وجبات عادية إلا أن أصناف الحلويات اللي عنده والشوكولاتة البلجيكية اللي بيستخدمها نقلته يكون من أفضل أماكن عمل الحلويات في مصر، مين يقدر ينكر جمال البراونيز ولا الكوكيز في الآيس كريم ولا الـ Chocolate fountain. جمال ما يتوصفش يتعاش بس.

ذا فات فور لايدز – The Fat  Four Ladies

من الأماكن اللي قدرت تكون زبائن لها بسرعة، المكان بيتميز  بجودة عالية وأسعار معقولة، فلو أنت من سكان الزمالك مش هتقدر تعيش من غير الكوكيز اللي بالشوكولاتة أو اللي بالجنزبيل ولا أنواع الكيك والكب كيك اللي ما تتقاومش أبدًا. يعني لو بتفكر بس تعمل دايت الفكرة اتنسفت.

كوبرملت  – Coppermelt

لما نحب نتكلم عن الأناقة والذوق العالي لازم نتكلم عن كوبرملت في التجمع، اللي دايمًا بيختار يمل حلوياته بطريقة مميزة وذوق عالي، يخلي اللي يشتري من عنده عارف كويس أن اللي بيشتريه مش هيلاقيه في أي مكان عادي.

ديوكس – Dukes

فتح من فترة قليلة وقدر يثبت وجوده وسط عمالة الحلويات، وده بسبب سعيه المستمر للتميز وتقديم حلويات مختلفة، مين فينا يقدر يقاوم سحر الـ dirt cake لحد دلوقتي وفكرتها المتميزة اللي شهرت المكان وخلته يفتح أكثر من 3 فروع في أماكن مختلفة.

نولا – Nola

 نجاح سلسلة محلات وانتشارها في مناطق مختلفة، حاجة مش سهلة، وده اللي قدرت تحققه نولا بسرعة، نجح المكان أنه يبني سمعة حلوة ويوفر أفكار جديدة في سوق الحلويات المصري، بدأ بعده أكتر من محل يقدم نفس المنتجات اللي بيقدمها. كب كيك أو كيكة عيد ميلاد أو كنافة بالمانجو او كب كيك بالبسبوبسة ريد فلفت كلها حاجات بتتميز بها نولا.

جو شوكليت بار – Joe’s Chocolate Bar

أجمل وافلز وكريب ممكن تاكلهم في الزمالك، الكلام كبير قوي هنا، مش بس الشوكولاتة اللي طعمها يجنن لا ده كل حاجة طازة وتدخلك في مملكة من الشوكولاتة الجميلة اللي ما تقدرش تخرج منها إلا وأنت مجرب أغلب الحاجات اللي فيها.

بول – Paul

لما نحب نتكلم عن أجمل مخبوزات في مصر، لازم نتكلم عن بول، مش بس علشان الحاجة بتكون فريش وخفيفة وماتتقاومش، لا ده كمان الأكلات العادية أو الحلويات مبهرين، وممكن يكون السر إن أغلب المنتجات بتستورد من الخارج فبيكون لها نكهة أنك بتجرب أكل مختلف ومبهج.

تي بي إس – TBS

من أكتر المحلات اللي بتساعدك تحافظ على صحتك وتستمتع بالأكل سواء علشان أنواع العيش والساندويتشات المختلفة أو المخبوزات اللذيذة جدًا اللي هتخليك تزعل بسبب كمية السعرات الحرارية اللي أكلتها بس كله يهون في سبيل الطعم الحلو.

ذا باتر هاف & كو – The Batter Half & Co

أصبح عنوان للرقي، الحلويات والشكل المغري من بره، وطعم مالوش زي من جوه، تركيبة مختلفة من إتقان أقل التفاصيل، ده غير أن كيك العيد ميلاد عندهم أو المناسبات مالهاش حل، من الآخر كل اللي بيعملوه له نكهة خاصة نابعة من القلب.