The Definitive Guide to Living in the Capital , Cairo , Egypt

رنا شرف

القاهرة مدينة مجنونة، والأكل فيها عملية متطورة ومش ثابتة، يعني مثلًا الكشري بالنسبة للمصريين هو أرز وعدس ومكرونة وباقي المكونات المدهشة، لكن فيه اختراع جديد بتقدمه سلسلة بـ لبن، وهو الكشري الحلو. تيجي تجربه معانا؟

 

بـ لبن مستمر في عمل حالة قلق في سوق الحلو في القاهرة، من فترة عمل حاجة جميلة اسمها القشطوطة، ودي عبارة عن كيكة وعليها كريمة وصوص كراميل، أوك، ولحد هنا تمام، بس الجديد بقى عندهم هو الكشري الحلو، كشري حلو؟ أيوة أنت قرأت الجملة صح!

الكشري الحلو هو طبق بيشبه الكشري، لكن كل مكوناته غير الكشري، يعني أرز باللبن بدل اأرز العادي، وكنافة متحمصة في السمنة بدل المكرونة، وصوص كريمة بدل الصلصة، وجلاش متحمص برضه في السمنة وقطع مانجا وصوصات بقى مختلفة زي الفسدق واللوتس والكيندر والنوتيلا، وغيرهم.

إحنا جربنا من عندهم كشري المانجا، وكان حلو بدرجة كبيرة، عبارة عن أرز باللبن وكنافة وكريمة ومانجا وجلاش، وده سعره 55 جنيه، والحقيقة عجبنا فيه مكس المانجا مع الكنافة، واللي فكرنا برمضان قوي. والجمل إنه كان حلو وخفيف عكس ما توقعناه أنه يكون تقيل.

تاني طبق كشري حلو جربناه كان كشري بستاشيو، واللي مليان فسدق، لكن ده كان تقيل شوية بس برضه حلو، هو نفس الخلطة بس عليها صوص الفسدق، وده سعره 60 جنيه.

التجربة كانت إيجابية، وأكيد هنكررها تاني، لأننا بنحب الحلو.

الحاجة السلبية اللي قابلتنا في المكان هي الزحمة، لكن علشان نجرب الكشري الحلو، استحملناها.

تقدروا تعرفوا أكثر عن بـ لبن وافتكاساتهم اللي مابتقفش من خلال صفحتهم على فيسبوك هنا.