The Definitive Guide to Living in the Capital , Cairo , Egypt

رمضان جانا وفرحنا به بعد غيابه أهلا رمضان، بدأت أيام الشهر الكريم وبدأت معاها العزومات والحلويات اللذيذة اللي مش بنستمتع بيها إلا في رمضان، فحبينا نوفر عليكم تعب التدوير على الأماكن اللي ممكن تشتروا منها حلويات السنة دي سواء علشان تستمتعوا بيها في البيت أو تاخدوها هدية معاكم لو معزومين.

 

ساليه سوكريه – Salé Sucré

ومن ضمن تشكيلة كبيرة من الحلويات والكنافة بالنوتيلا والبسبوسة بالريد فلفت حبينا نختار أكتر حاجة المكان ده متميز فيها من وجهة نظرنا ومش هتلاقيها في أي مكان تاني. وهي Petits Choux aux Dates بتي شو بالبلح.

ودي عبارة عن قطع عجينة (شو) زي اللي في البروفترول بس محشية كريمة وقرفة ومتغطية بالبلح والكراميل. وسعرها 140 جنيه للحجم الصغير و200 جنيه للحجم الكبير.

تفاصيل ومنتجات أكتر على صفحتهم على الفيسبوك هنا.  

 

 

نولا  – Nola

ونولا راجعة بقوة السنة دي ومحيرانة بين الأنواع الجديدة اللي عملاها ما بين جلاش بالكريمة وحلاوة جبن بالريد فلفت والنوتيلا وأم علي ده غير اللوتس بوت بالشوكولاتة والبسكوت، بس أكتر حاجة ضعفنا قدامها كانت الكنافة فولكانو وتقدروا تضعفوا معانا لما تشوفوا الفيديو ده مع أول قطعة بالسكينة للكنافة والشوكولاتة بتسيح قدامك زي انفجار البركان بالظبط، تقدروا تشوفوا الفيديو هنا بس نصيحة بلاش وأنتم صايمين. وسعر الـ Conafa Volcano بـ  260 للحجم الكبير و40 للحجم الصغير. وتقدروا تتابعوا باقي الاختراعات من على صفحتهم على الفيسبوك هنا.

 

 

ديوكس – Dukes

 

ديوكس السنة دي ما بخلش علينا بحاجة زي السنة اللي فاتت، ما بين الكنافة نوتيلا والكونافة ريد فلفت والقطايف والحلويات الشرقية، أخترنا لكم بسبوسة بالمانجو على سبيل التغيير. وسعرها 200 جنيه.

وتقدروا تتابعوهم من صفحتهم على الفيسبوك هنا.

 

سلطانة – Sultana

 

عشاق الآيس كريم استمتعوا السنة اللي فاتت بأجمل آيس كريم بالكنافة من سلطانة واللي عملت السنة دي إضافات جديدة وزودت عدد عصيان الكنافة في “آيس كريم القشطة بالكراميل” غير إنها ماحبتش تحرم الناس من جمال حلو “غزل بيروت” وعملت آيس كريم بالمستكة والحلاوة الشعر. ده غير طبعًا أيس كريم الكنافة بالمانجو والقشطة بالفراولة والكنافة. وإحنا الحقيقة احترنا نرشح لكم إيه ولا إيه فسيبنا الأختيار لكم وتقدروا تتابعوهم من صفحتهم على الفيسبوك هنا.

 

برو أند شو – Brew & chew

 

برو أند شو رفع شعار مش لازم تعمل دايت، والحقيقة إننا في الأيام العادية مابنقدرش نعدي من قدامه من غير ما ندخل ونستمتع بألذ حلويات فإيه العمل في رمضان خاصة مع أختراعاته الجديدة.

مابين الكنافية بالنوتيلا والتوت والفسدق والحلويات اللي تجري الريق من جمالها ظهرت لنا مفاجأة Konafa Carmel Fire Ball ودي ما تتشرحش دي تتشاف وتتأكل بس وبـ 42 جنيه، لكن للأسف هي في فرع إسكندرية بس حاليًا ولسه ما نزلتش القاهرة. وتقدروا تتابعوا باقي الأختراعات من على صفحتهم على الفيسبوك هنا.

 

 

كاروسيل – Carousel

أما كاروسيل فهي بتخيرنا ما بين الكنافة ريد فلفت اللي لا تقاوم والكنافة نوتيلا بالمالتيزرز بس إحنا هنسيبكم تحتاروا معانا. وتقدروا تحتاروا أكتر من خلال صفحتهم على الفيسبوك هنا.

 

ديفور – Devour

سنة وراء سنة بيثبت لنا أن الطبخ فن وبرغم أن ما زودش في المنيو بتاعه حاجات كتير مع حاجات السنين اللي فاتت إلا أنه عمل كنافة بالحلاوة وجلاش بالقشطة بس إحنا حبينا نختار أكتر حاجات بنحبها عنده وهي الكنافة بومب واللي فيها كل أنواع الشوكولاتات اللي بنحبها، وتقدروا تتبعوا باقي حاجته من على صفحته على الفيسبوك هنا.

ذا باتر هاف أند كو – The Batter Half & Co

هم مش بيهزروا يا جماعة وحالفين يا نتخن أو ننهار من كمية السكر وقدموا لنا بسبوسة بالنوتيلا!!! الله على الجمال.

وتقدروا تتابعوهم من هنا.

 

 

مونجيني – Monginis

والمفاجأة بالنسبة لنا كانت تورتة مونجيني اللي حاطين شعار (تورتة شكلها.. شرقي قلبها)، وعملوا تورتة على شكل هلال من فوق فيه فاكهة ومن تحت طبقات كنافة وبسبوسة. وتقدروا تتابعوا باقي حلوياتهم وأسعارهم المعقولة من على صفحتهم على الفيسبوك هنا.

 

 

تورتينا – Tortina

 

ومافيش أجمل من قطايف تورتينا نختم بيها مقالنا، واللي بتقدم لنا قطايف بالقهوة والنوتيلا والتراميسو، ده غير أم علي اللي بالكريم بروليه والمارنج يعني حاجة آخر دلع، وتقدروا تتابعوا باقي حلوياتهم على صفحتهم على الفيسبوك هنا.