The Definitive Guide to Living in the Capital , Cairo , Egypt

شرب القهوة حالة خاصة جدًا على رأي “أنغام”، فيه اللي بيحبوها محوجة واللي بيفضلوها سادة واللي بيستطعموها غامقة أو فاتحة. وكل شخص بيشرب قهوة له رؤية مختلفة عن التاني، ومن أكتر الموضوعات المرهقة في شغلنا في كايرو 360 إننا نكتب عن القهوة، لأن الحقيقة فيه أماكن كتير جدًا بتقدم نوعيات بن مختلفة وكويسة، ولكن خلال السطور الجاية هنقول لكم على 5 أماكن بتقدم قهوة حلوة، أكيد فيه أماكن تانية في مناطق مختلفة بتقدم قهوة كويسة، ودي حاجة نحب نعرفها منكم في التعليقات علشان تكونوا بجد “دليل العاصمة”.

Circle K

رغم إن فروعه مش كلها في نفس المستوى، لكن مذاق البن عندهم مميز وحلو، وأكيد بيختلف من مكان للتاني علشان حاجات كتير، ولكن يفضل من أهم وأفضل الأماكن اللي بتقدم قهوة حلوة في القاهرة.

الفيشاوي

القهوة عند الفيشاوي حالة مختلفة، وبعيدًا عن أن البن هناك نوعيته كويسة والتسوية على الرمالة بيديها طعم مختلف، لكن الجو العام بيخليكم تشربوا القهوة بمزاج، وأجواء القاهرة التاريخية الجميلة، وماتنسوش تستمتعوا بأجواء ليالي الحسين هناك.

Bellaila

الفيو على النيل في الدقي وقدامكم برج القاهرة كفاية أنه يعدل مزاجكم، فتخيلوا بقى لما يكون معاه فنجان قهوة حلو ومظبوط، طيب إيه رأيكم كمان أنكم ممكن تعملوا القهوة بنفسكم بسبرتاية بتجيلكم لحد عندكم،. عيب المكان إنه غالي لو داخلين تشربوا قهوة بس لأن المينيمم عندهم 250 جنيه.

الغرباوي

من مميزات بن الغرباوي أن البن اللي بيقدموه هو بتاعهم بتوليفتهم بكل تفاصيلها، وجربنا من عندهم أكتر من نوع بن في فرع شارع 9 المعادي وكل مرة بيكون بجودة وطعم مميزين تستاهل إننا نرشحه لأنه بيقدم قهوة “حلوة”.

Second Cup

من الأماكن اللي اكتشفنا بالصدفة إنها بتقدم فنجان قهوة حلوة، وله طعم مميز ومختلف، وبنرشح بقوة أنكم تجربوه، وهما عندهم فروع كتير وإحنا جربنا فرع الدقي.