The Definitive Guide to Living in the Capital , Cairo , Egypt

بقلم: رنا شرف

شهر رمضان بيحب العصائر والمشروبات، وإحنا بطبيعتنا بنحب نكتر من العصائر، خصوصًا لما تكون صحية وطبيعية، وعلشان الجو الحر والصيام هنعرفكم على 5 محلات عصائر في القاهرة بتقدم منتجات بجودة عالية وبسعر مناسب.. تعالوا نعرفهم مع بعض.

 

حامد الإسكندراني

من المحلات المشهورة في مجال العصائر، عنده كل المشروبات بأنواعها، والمشروبات الرمضانية طبعًا، وأسعاره معقولة. عنده مشروب العرقسوس بـ 15 جنيه للزجاجة، وده كمان نفس سعر السوبيا.

حامد الإسكندراني موجود في شارع 22 أحمد بدوي، شبرا مصر.

 

 سيتي درينك

معروف جدًا في القاهرة، وله فروع كتير أشهرها فرع المعادي الجديدة عند تقسيم اللاسلكي، وأسعار العصائر الرمضانية معقولة، يعني سعر كوب السوبيا بيدأ من 15 جنيه، واللتر 41 جنيه، وسعر كوب الخروب 11 جنيه، واللتر سعره 29 جنيه.

 

فريش القبيصي

من الأماكن الجميلة جدًا اللي جربناها مؤخرًا (هتلاقوا التفاصيل هنا). وعصائر رمضان عنده بصراحة مميزة وجديدة جدًا، عنده السوبيا بنكهة اللوتس، وسوبيا بنكهة القهوة، وسوبيا بنكهة البلح، وكلهم بسعر اللتر 35 جنيه.

له فروع كتير من ضمنها فرع 20 ميدان لبنان المهندسين.

السندباد

مكان مميز، عملناله ريفيو من فترة (هتلاقوه هنا).

العصائر عنده سعرها بيبدأ من أول 5 جنيه، ممكن تشرب كوب سوبيا أو تمر على سوبيا أو خروب بسعر 5 جنيه، والمكان له فروع كتير، من أشهرهم فرع 33 شارع قصر النيل تقاطع شارع شريف بوسط البلد.

 

أبو ليلة

مشهور بعصائره الجميلة والمميزة، عنده التمر الهندي بيبدأ من 6 جنيه، والخروب كمان بنفس السعر، وفيه طبعًا تشكيلة كبيرة من العصائر الرمضانية.

أبو ليلة موجود في فيلا 13 شارع 9 بالمقطم.

 

اللي فاتت كانت محلات عصير جربناها وعجبتنا، لو جربتم محلات تانية قولولنا علشان نجربها ونكتب عنها. كل سنة وأنتم طيبين يا أهل القاهرة.