The Definitive Guide to Living in the Capital , Cairo , Egypt

الكافيهات في مصر عامة والقاهرة بشكل خاص دايمًا بيكون فيها فكرة مختلفة ولها شكل ورونق خاص بيها وبتعبر عن فكرتها بشكل مميز، وده اللي لقيناه بالصدفة في الزمالك داخل A/N اللي فكرته قائمة أن المكان بيتجمل برواده ومش محتاجين يتعبوا في أنهم يختاروا اسم أو يعملوا ديكورات مميزة، وخلال السطور اللي جاية هنقولكم على كل اللي محتاجين تعرفوه عن الكافيه وفكرته اللي عجبتنا.

البداية المكان صغير وفيه تقريبًا 8 ترابيزات بس ان دور وآوت دور، واللون الأبيض مسيطر على المكان ولما تدخلوا وانتوا بتشوفوا المنيو بيقدموا لكم خدمة مميزة أنكم تتعطروا بأجمل العطور اللي بيقدموها مجانًا وتستمتعوا بالأجواء الخليجية سواء في الخدمة أو الروائح أو حتى قائمة المشروبات.

بدأنا تجربتنا بمشروب الصيف بما أن الجو حر وكان آيس تي خوخ وسعره 120 جنيه وكان طعمه لطيف رغم أن طعم الخوخ كان خفيف في البداية ولكن ظهر بقوة في نهاية الكوب خلى الطعم مكمل معانا.

كمان جربنا من عندهم مشروب الكركديه وسعره كان 120 جنيه، وخلينا نقول أنها أطعم حاجة جربناها بالمكان والطعم كان حكاية ولو مش بتحبوا الكركديه قوي المكان ده هيغير لكم فكرتكم وهتحبوه.

أما الشاي فقررنا نجرب شاي بالنعناع من عندهم وسعره 45 جنيه، وخلينا نقول أنه مكنش مميز ولكن شغال ويتشرب رغم أن اللي كان ظاهر فيه طعم النعناع السيرم ولكن جودة الشاي هي اللي فرقت معانا، وعلشان كده بنرشح لكم تشربوا شاي عادي.

المكان بيقدم فرايتي مميز وكلاسيكي والقعدة فيه لطيفة والخدمة ممتازة وبننصح بيه في كل وقت.

تقدروا تعرفوا أكتر عنهم من خلال أكونت انستجرام من هنا.