The Definitive Guide to Living in the Capital , Cairo , Egypt

الصيف في القاهرة مش هزار، شمس وزحمة وحر يخليك تدور على أي حاجة تبرد قلبك قبل جسمك. ولو كنت من عشاق القهوة، فالمعادلة هنا بسيطة؛ القهوة لازم تفضل في حياتك، بس بشكل أخف وألطف.. وهنا بييجي دور الآيس كوفي. المشروب اللي بقى جزء من يوم ناس كتير، سواء وأنت نازل شغل، أو خارج مع أصحابك، أو حتى قاعد لوحدك بتحاول تظبط مزاجك.

في الدليل ده، جمعنالك مجموعة من مجموعة من أحلى أماكن الآيس كوفي في القاهرة، أماكن بتقدم مشروبات بطعم مظبوط، وقعدة حلوة، وتجربة تستاهل تكررها.

جلال كافيه

لو بتحب تدعم براند مصري بدأ من الصفر وكبر، فجلال كافيه واحد من الأماكن اللي تستحق التجربة. أصله من بورسعيد، لكنه قدر يثبت نفسه في القاهرة بجودة مشروباته وطعمه المختلف. الآيس كوفي عندهم مش مجرد مشروب، لكن تجربة بطعم غني وفليفرز واضحة زي الكراميل والفانيليا. وكمان عندهم تشكيلة حلويات لطيفة زي التشيز كيك والمولتن كيك، واللي بيكملوا مع القهوة بشكل مثالي.

العنوان: شارع سيد زكريا، مول بارك بلازا، شيراتون.

شغف

لو عاوز مكان هادي تشتغل فيه وفي نفس الوقت تشرب آيس كوفي محترمة، فـ شغف هيكون اختيار مناسب جدًا. المكان معمول أساسًا للي عاوزين يقعدوا ساعات يشتغلوا أو يذاكروا في هدوء. الكوفي عندهم بتتقدم بكل أنواعها، والآيس كوفي بتتقدم بجودة كويسة وطعم متوازن، يخليك تركز وفي نفس الوقت تستمتع.

الفروع: الكوربة، الدقي، المعادي، المنيل.

كوفي كلتشر

من الأماكن اللي بقت تريندي جدًا وسط الشباب في القاهرة. كوفي كلتشر معروف إنه بيقدم تجربة كاملة، من أول شكل المكان لحد طعم المشروبات. الآيس كوفي عندهم متنوعة جدًا، من الكلاسيك لحد الفليفرز الحديثة. صحيح الأسعار أعلى شوية من المتوسط، لكن الجودة والخدمة بيخلوا التجربة مستاهلة.

العنوان: ممشى أهل مصر – بوابة 13.

نورث30

لو بتحب قعدات الزمالك والهدوء النسبي بعيد عن الزحمة، نورث30 من الأماكن اللي لازم تتحط على ليستك. المكان مشهور بقعدته المريحة وديكوراته الهادية. الآيس كوفي هنا طعمها مضبوط، والمكان مناسب سواء لقعدة لوحدك أو مع أصحابك.

الفروع: 6 أكتوبر، مول العرب، القاهرة الجديدة، الزمالك

La UNA Cafe – لا أونا كافيه

ميزة المكان ده إنه مش بس كافيه، لكنه تجربة متكاملة. تقدر تبدأ يومك بفطار خفيف، وتشرب آيس كوفي على النيل، أو حتى تكمل اليوم هناك بغدا أو عشا.
القعدة على ممشى أهل مصر بتضيف إحساس مختلف، خاصة مع الهوا في الصيف. والآيس كوفي هنا مناسبة للي عاوز حاجة خفيفة ومنعشة وسط اليوم.

العنوان: ممشى أهل مصر.

بارنز

اسم معروف لعشاق القهوة، خصوصًا في سيتي ستارز. بارنز عنده سمعة قوية في تقديم خلطات قهوة مميزة.

لو بتدور على آيس كوفي بطعم ثابت وجودة معروفة، المكان ده اختيار آمن جدًا. مناسب للناس اللي بتحب تروح مكان وهي عارفة هتشرب إيه بالظبط.

ستيدج أوف فلورز

في الدقي وعلى النيل مباشرة، المكان ده بيقدم واحدة من أحلى القعدات اللي ممكن تعيشها في وسط الأسبوع. الفيو على النيل بيخلي تجربة الآيس كوفي مختلفة تمامًا. المشروبات بشكل عام كويسة، والآيس كوفي مقبولة جدًا، لكن العنصر الأقوى هنا هو القعدة نفسها والهدوء النسبي.

العنوان: 109 شارع النيل، ميدان الجلاء، الدقي.

وأخيرًا..

سواء كنت عاوز قعدة هادية تشتغل فيها، أو مكان على النيل تفصل فيه من اليوم، أو حتى كافيه تريندي تخرج فيه مع صحابك، القاهرة فيها اختيارات كتير جدًا للآيس كوفي. الفكرة مش بس في المشروب، لكن في التجربة الكاملة اللي بتتضمن المكان والقعدة والمزاج اللي بتطلع بيه.