The Definitive Guide to Living in the Capital , Cairo , Egypt

شاب صعيدي جدع ودمه خفيف، من مواليد محافظة سوهاج سنة 1975 وصل القاهرة وبدأ رحلته من جامعة حلوان، وخد بكالوريوس التجارة وإدارة الأعمال، لكن ماعملش بيه حاجة، وده لإن شغفه بالكتابة كان كبير ومالي تفكيره، ومع خلطة جميلة من خفة الدم وإدراك الواقع، ومعايشة الناس وقضاياهم، وخصوصًا جيله والناس اللي حواليه، بدأ يكتب خاجات كتير، بتلمس الناس وبتضرب نور عالي على محطات في حياتهم، وهو ده في كلمتين “عمر طاهر”.

النهارده وكاعتراف مننا في كايرو 360 بأهمية ومدى تأثير عمر طاهر على خريطة الكتّاب والصحفيين في مصر، حبينا نشارككم أهم 3 كتب من تأليفه، سابوا بصمة كبيرة في حياة اللي قرأوهم:

1- رصف مصر:

 تحوير صغير لمجلد “وصف مصر” اللي دونت فيه الحملة الفرنسية ملاحظاتها عن مصر، في مجلد اسمته “وصف مصر”، لكن في كتاب “رصف مصر” عمر طاهر بيكتب ملاحظات “ابن البلد” عن بلده.

الكتاب يعتبر من أول العنوان لحد الفهرس كتاب ساخر، وهو عبارة عن تجميعة متكلفة لمقالات عمر طاهر في جريدة “الدستور” في الفترة ما بين سبتمبر 2008 ومارس 2009.

العمق والمجهود واضحين في “رصف مصر” ده غير لمسة الفنان العبقري وليد طاهر برسوماته المعرة جدًا عن كل مقال بنقرؤه.

 تقييم الكتاب على Goodreads هو: (3.69 من 5).

2- كتاب المواصلات:

حكايات شخصية لمشاهد ومواقف عادية بنمر بيها كل يوم بيحكيها “عمر طاهر” في كتابه ده، لكن الجديد اللي أضافه عمر، غنه خلى للمواقف والمشاهد دي معنى وعمق.

الكتاب هدفه الأساسي إنك تقتقل الوقت اللي بتقضيه في المواصلات يوميًا، وإنه يشاركك الطريق، سواء في المترو، ولا في الميكروباص، ولا حتى في الطائرة.

 تقييم الكتاب على Goodreads هو: ( 3.76 من 5).

3- إذاعة الأغاني:

من أفضل الكتب اللي كتبها عمر طاهر، وبسببه خد جائزة أفضل كتاب في استفتاء المكتبات والقراء سنة 2015.

الكتاب عبارة عن حكايات وذكريات لمواقف حصلت لعمر طاهر شخصيًا وارتبطت معاه بأغنية كانت شغالة في اللحظة اللي حصل فيها الموقف ده، أو الذكرى دي، فبالتالي مش ممكن نصنف “إذاعة الأغاني” على إنه سيرة ذاتية، ولا كتاب توثيقي عن الموسيقى، ولا مقالات عن النوستالجيا والحنين، إنما هوه “حالة” فريدة، هنشوف فيها الأغاني من زاوية جديدة.

تقييم الكتاب على Goodreads هو: (4.03 من 5).