The Definitive Guide to Living in the Capital , Cairo , Egypt

كتب

تقرأ إيه في رمضان؟ نصايح من كتاب شباب لقراء كايرو 360

تقرأ إيه في رمضان؟ نصايح من كتاب شباب لقراء كايرو 360
بواسطة
Ahmed Abd El Gawad

القراية في رمضان موضوع كبير، آه رمضان شهر الصيام والقيام، لكنه برضه شهر فيه رحمات من ربنا على عباده، ومن الرحمات دي، إنه نزل فيه القرآن، وكانت أول آية هي اقرأ، علشان كده قررنا نشوف نصايح من مبدعين وكتاب شباب عن تكنيك القراية في رمضان.

 

أنيس منصور.. بهاء طاهر.. وغيرهم

أميرة فرير رسامة ومصممة أغلفة كتب، شاركت كايرو 360 حالة القراية، وجمعت لنا مجموعة مقولات قالت إنها بتمثل لها معنى القراية وأهميتها، وإن المقولات دي، هي اللي عايشة بيها في حياتها، وهي فلسفة القراية عندها في كل الشهور، والمقولات دي منها، مقولة أبـو عمرو بن العـلاء:  ومـا رأيت أحداً وفي يده دفـتر، وصاحبـه فـارغ اليـد، إلا اعتقدت أنه أعقل وأفضل من صاحبـه.

واستشهدت كمان بالسؤال اللي اتسأل لأرسطـو: كيـف تحكم على إنسـان؟ فأجـاب: أسأله كم كتابًا يقرأ وماذا يقـرأ، وهي شايفه إن الجاحظ بيلم فكرة القراية كلها بجملته المعروفة: “الكتاب هو الجليس الذي لا يطريك، والصديق الذي لا يغريك، والرفيق الذي لا يملّك، والصاحب الذي لا يريد استخراج ما عندك بالملق ولا يعاملك بالمكر ولا يخدعك بالنفاق ولا يحتال لك بكذب.

ولما سألناها عن أكتر حاجة بتحبها في القراية، وترشيحاتها للقراية في رمضان، فكان ردها بمجموعة كبيرة من الكتاب، هي بتحبهم، زي أحمد خالد توفيق ..نجيب محفوظ ..مصطفى محمود..رضوى عاشور..يوسف إدريس..عبد الحميد جودة السحار..بهاء طاهر..أنيس منصور..محمد المنسى قنديل..إبراهيم الفقى ..خولة حمدى، وتحديدًا روايتها “في قلبى أنثى عبرية”، واللي شايفه إنها  حلوة لرمضان، وكمان يليق برمضان كتب عبد الحميد جودة السحار، اللي عمل مجموعة من أفضل الكتب الإسلامية، والسيرة النبوية، بأسلوب سهل أوى، وممكن قصة أو رواية، ليوسف ادريس وأنيس منصور، لإن أسلوبهم سهل.

 

اقرأ أي شيء

الشاعر بيشوي وجيه نفسه القراية تكون طول الوقت، فبيقول: “اقرا أي شئ يقع تحت إيدك مهما كان، ولازم تعرف إن مش كل اللي بتقراه حقيقي ولا شرط تصدقه، ولكنه هيضيف لك.

وبيكمل عن فكرة القراية بيقول: “في قرايات كتير هتكون بتقراها ومش واصلك المعنى، أرجوك ماترميش الكتاب وكمله، لأن مع الوقت وكثرة القراية هتكتشف أن ممكن تحصل على فكرة ورأي ورؤية ولو من جملة من كل كتاب مسكته.

 

نظم وقتك في رمضان

المهندسة والكاتبة سارة أحمد شايفة إن شهر رمضان هو شهر الخير والنفحات، علشان كده لازم الناس تستفيد من البركة دي وتنظم وقتها، علشان تستفيد باكبر قدر من الطاعة والعبادة.

واقترحت تقسيم الوقت بين كتب في العقيدة الإسلامية زي “كتاب صيد الفوائد”، أو كتب عن الفقه الإسلامي الخاص بالأحكام الشرعية زي “كتاب فقه السنة، أو الفقه الميسر”، وفي تفسير القرآن الكريم، ممكن الرجوع لكتاب “في ظلال القرآن”، وفي الحديث انتقاء حديث وتفسيره ، وده موجود في كتاب “اللؤلؤ و المرجان”، ولو بتحب السيرة النبوية الشريفة، يبقى عليك بكتاب “الرحيق المختوم”، أما لو أنت من محبي القصص في رمضان، يبقى سير الصحابة والتابعين، ودي هتلاقيها في كتاب “رجال حول الرسول”.

 

رمضان شهر القرآن

والشاعر محمد فرغلي، ليه بقى رأي مختلف عن القراية في رمضان، فهو شايف إن القراءة فى شهر رمضان الكريم مرهقة جدًا، بالذات إن مافيش كتاب ممكن ياخد أهمية القرآن في شهر رمضان، لإنه بيتحول من مجرد ورد يومي إلي أجتهاد روحاني، وهو شايف إن القراية بعد القرآن، أو بالتوازي معاه، بتكون فى التفسير بشكل كبير، وبعدها ممكن يقرأ في كتب السنة اللي بتعرف المسلم على كنوز شهر رمضان.

وفرغلي شايف إن النفس عايزه توسع مداركها، وتزود من قوتها بالذات في الشهر ده، وهو شايف إن كتب التفسير ليها قوتها في تثبيت الحالة الإيمانية على الإنسان، علشان كده بيرشح تفسير الشعراوي رحمه الله ، مجلة الأزهر علشان مواضيعها الكتير والمختلفة، وكتاب الحكم العطائية لابن عطاء الله السكندري.

 

اقرأ 40 دقيقة

وبرغم إننا كسكان القاهرة ساعات بنحتاج نهرب من دوشة المواصلات والزحمة وضغط الحياة بالاستمتاع بكتاب مفيد أو خيالي، إلا إن الموضوع على الناحية التانية من الأراضي الفلسطينية مش بيكون مشابه مع ضغط الدفاع عن الأرض والعرض والتاريخ وصور المقاومة بأشكالها المختلفة بيكون صعب على بعض الفلسطينيين أنهم يلاقوا القدرة النفسية اللي تخليهم يهربوا من واقعهم بالقراءة بعد ما اتعودوا على المواجهة وده اللي قالته الشاعرة الفلسطينية سجود طه، اللي كان لها رأي يحترم، وهي قررت تكتبه باللهجة الفلسطينية، وإحنا قررنا ننزله زي ما هو ونختم بيه موضوعنا، بتقول سجود:

“بسم الله نبدأ..إحنا كفلسطينية دائمًا بنميل للخيال أكثر من الواقع.. ومثل ما بنعرف إنه الخيال هو متعة العقل، وأول ما ببدأ الجد بنشعر بالتعب والإرهاق النفسي..ولهذا السبب في صديقة نصحتني اقرأ بطريقة 40/10 اللي هي بتتلخص في أنه أقرأ 40 دقيقه متواصلة وأعمل استراحة 10 دقائق.. هذه الطريقة ناجحة جدًا اذ كان الكتاب ثقيل وجد وفي حقائق تاريخية أو علمية..

وبعكس الشائع..القراءة في رمضان جدًا جميلة وملهمة خصوصًا إن الصائم بكون عنده صفاء ذهني وروحي..علشان هيك أي كتاب بتحب يكون ثابت في مخك حاول إقرأ في رمضان.. رمضان مبارك وكل سنة وأنتو سالمين”.

مقترح