The Definitive Guide to Living in the Capital , Cairo , Egypt

من كام يوم، وصلت لنا دعوة، من الكاتبة وخبيرة المونتيسوري مروة رخا، علشان نحضر إطلاق أحدث أعمالها (حديث النحل والطيور).

سابق معرفتنا بمروة كخبيرة مونتيسوري، وككاتبة، وكمان على المستوى الشخصي من خلال علاقتها بابنها آدم، جعلت عندنا فضول نعرف مروة عندها إيه جديد تقدمه. والمرة دي جديد مروة رخا كان في مجال التربية الجنسية للأطفال، ومش مجرد كتاب تقليدي أو مجموعة مقالات، لكن من خلال كتاب تفاعلي بيستخدم أحدث التقنيات علشان يبسط المعلومة ويقدمها على شكل لعبة مُسلية. تعالوا نعرف أكتر عن حديث النحل والطيور.

 

حديث النحل والطيور هو كتاب تفاعلي، صممته مروة بمساعدة ابنها آدم، علشان تبسط للأطفال المعلومات الجنسية الأساسية، وبيستهدف الكتاب بالأساس الأطفال من 6 الى 12 سنة. من خلال قصة لطيفة عن ولد بيحب يتابع الطيور، وبنت بتحب تتفرج على الزهور، وإزاي الأسئلة المهمة للولد والبنت عن طرق التكاثر والتزاوج والتخصيب، ها تكون المفتاح للمتلقي، أنه يعرف أكتر عن الموضوعات دي.

والحقيقة أن مروة بتقتحم بكتابها منطقة شائكة جدًا، لأن النوعية دي من الإصدارات بتكون إما موجهة للأهل بالأساس، أو بتخاطب الأطفال بطريقة مش جذابة، بالتالي بتفقد أهميتها وبيحس  الأطفال بالملل وأنهم مش عاوزين يكملوا قراءة.

لكن المميز في حديث النحل والطيور، واللي قدرنا نلقي نظرة مُطولة عليه من خلال شرح مروة لمكونات الكتاب في الحدث اللي أقامته للصحفيين، أنه بيقدم المعلومة بطريقة تفاعلية، ومن خلال ألعاب مسلية زي لعبة الكلمات المتقاطعة، أو البازل، أو البحث عن الكلمة المفقودة.

ولأنها عارفه كويس أن الأجيال الجديدة مرتبطة أكتر باستخدام التابلت أو الموبايل والوسائل التقنية الحديثة بشكل عام، كتاب مروة متاح بشكل الكتروني تمامًا، وده يضمن للأهل أنهم يقدموا لأولادهم معلومة موثقة بشكل حديث وآمن في نفس الوقت.

عجبنا قوي فكرة مشاركة آدم أحمد ناجي، إبن مروة، في تصميم الكتاب، واختيار الألوان والمساعدة في تصميم الصور باستخدام تقنيات الذكاء الاصطناعي، لأن مهما كُنا متخيلين إننا قادرين نتواصل مع الأطفال، هيكون الأفضل أن يتواصل معاهم حد من سنهم وعارف ذوقهم كويس. عجبنا كمان احترام مروة لمشاركة آدم في الكتاب، حتى أنها بتقول أن لولا آدم ماكانش (حديث النحل والطيور) ظهر للنور.

مروة رخا كانت عاوزه تنشر كتابها مجانًا، لكنها اضطرت لشراء أدوات احترافية علشان يخرج الكتاب بأفضل صورة ممكنة، وده تم بالتعاون مع تطبيق “كتبي” المتخصص في تحويل الكتب لعناصر تفاعلية، بالتالي مروة أتاحت الكتاب بسعر خمسة دولار – أو ما يعادله بالجنيه- وأتاحت وسائل مُختلفة للدفع تناسب كل الناس على موقعها والحقيقة أننا بنشجع الأهل اللي عاوزين يعلموا أبنائهم المعلومات الجنسية، ومش عارفين أو مكسوفين أو مترددين، إنهم يحملوا كتاب مروة. لأن الثقافة الجنسية في مجتمعاتنا الحديثة أصبحت ضرورة مش اختيار رفاهي.