حكايات مرحة وتأملات… سلسلة كتب أدب رحلات تستحق القراءة
أدب رحلات أوروبا الصين تايلند جمال عمارة حكايات مرحة وتأملات سفر كتب مميزة ماليزيا مكتبات القاهرة
Cairo 360
في كايرو 360 بندور دايمًا على الكتب المميزة في مكتبات القاهرة علشان نعرفكم عليها، ومؤخرًا استمتعنا جدًا بسلسلة كتب أدب رحلات للكاتب جمال عمارة عنوانها الرئيسي هو “حكايات مرحة وتأملات”.
المجموعة بتتكون من 4 كتب بيحكي فيهم الكاتب عن رحلاته لدول مختلفة وأسماء الكتب هي الصين، تايلند وماليزيا، إندونيسيا وسريلانكا، أوروبا في 21 يومًا.
أسلوب الكاتب مميز جدًا، بيتميز بسخرية شديدة وفي نفس الوقت بيخليك تعيد تفكير في أمور كتير بطريقة فيها فلسفة وحكمة.
الكتب دليل مهم جدًا لأي حد بيفكر يخوض تجربة السفر لوحده بأقل التكاليف، الكاتب جمال عمارة بيعرفك بالخطوات إزاي تسافر لوحدك من الألف إلى الياء، والكتب بتتميز كمان بصور حلوة صورها الكاتب بنفسه.
نقدر نقول إن الكتب بتحترم التكنولوجيا، من خلال كيو آر كود عمله الكاتب في صفحات كتير من الكتب بينقلك مباشرة لصور وفيديوهات على الإنترنت عن حاجات بيتكلم عنها.
أغلفة الكتب الأربعة فنية جدًا وألوانها مبهجة، بتعرض صورة للكاتب مرسومة وسط معالم سياحية في البلد اللي هو بيتكلم عنها.
أكتر حاجة عجبتنا في الكتاب بعد الأسلوب المميز والصور الحلوة هو التنسيق المحترف اللي بيخليك تحس إن الكاتب تعب جدًا في إخراج الكتب علشان يقدمها بشكل رائع خالي تمامًا من أخطاء التنسيق أو حتى الأخطاء اللغوية والنحوية.
طباعة الكتب كمان فاخرة جدًا وتخليك ماسك الكتاب وأنت مبسوط من جودة الطباعة والإخراج الفني.
لكن أكتر حاجة ضايقتنا في الكتاب هو إن الكاتب كان بيحط سمايل فيس بشكل مبالغ فيه، وحقيقي الإيموجي ده مزعج للعين وبيشتتك وأنت بتقرا. نتمنى من الكاتب ينسى السمايل فيس ده تمامًا وما يستخدمهوش تاني أبدًا 🙂
بصفة عامة بنرشح المجموعة الهايلة دي لكل الناس اللي بتحب السفر، أو اللي بتخطط تسافر في المستقبل، أو حتى اللي ما بتحبش السفر لكن بتحب الكتب الحلوة اللي ليها هدف وفكرة وبتقدم قيمة حقيقية.
تقدروا تتواصلوا مع الكاتب من خلال مدونته في اللينك ده.
وتقدروا تشتروا الكتب من هنا.
مقترح
معالم وسياحة
مسجد أيتمش البجاسي.. جوهرة مملوكية في قلب القاهرة
آثار القاهرة الإسلامية الدرب الأحمر +8
الحياة في كايرو
