The Definitive Guide to Living in the Capital , Cairo , Egypt

معرض الكتاب قرب، وعلشان ما تبقاش محتار، إحنا هنقولك على ترشيحاتنا لأهم 10 كتب صدرت في 2018، لكتاب عرب أو مصريين، الكتب دي مميزة فعلًا، ولازم تتأكد إنهم موجودين في مكتبتك في 2019، تعالوا نعرفهم مع بعض.

• حرب الكلب الثانية – إبراهيم نصر الله

والرواية دي فازت بجايزة البوكر لسنة 2018، وهي من روايات الخيال العلمي، وبيتكلم فيها الكاتب عن نزعة التوحش المنتشرة في المجتمعات، وانتشار النزعة المادية، والبعد عن الأخلاق والقيم.

الكاتب (إبراهيم نصر الله) من فلسطين قال عن روايته، إن أجمل ما في “حرب الكلب الثانية”، واللي تعتبر أول رواية خيال علمي يكتبها، إنها صحت مناطق جديدة في عقله وخياله.

• وللجاسوسية فنون – د. نبيل فاروق

طبعًا د.نبيل فاروق غني عن التعريف، تقريبًا اتربينا كلنا على قصصه القصيرة للجيب و اللي أشهرها لحد النهاردة سلسلة روايات “رجل المستحيل”.

وكتاب “وللجاسوسية فنون” اللي رجع بيه تاني د.نبيل باين من عنوانه طبعًا، واللي بيتكلم فيه عن الجواسيس وحروب الجيل الرابع والخامس والسادس كمان.

الكتاب ده هيخيليك تندم لو ما كنتش قرأت لـ د.نبيل قبل كده، ولو كنت قرأت له قبل كده، فالكتاب ده تكملة لإبداعاته.

• النجدي – طالب الرفاعي

و هي رواية للكاتب الكويتي طالب الرفاعي، وبيسرد فيها لقطات من التراث الكويتي، عن طريق قصة حياة البطل (علي النجدي)، اللي بيمثل أسطورة بحرية خليجية.

الرواية فيها معلومات حلوة في سياق سينمائي درامي للمهتم بالحياة القديمة في الخليج العربي، بالإضافة لبعض المعلومات البحرية زي مصطلحات البحارة، وطرق تجهيز السفن.

• كتاب المواصلات حكايات شخصية لقتل الوقت – عمر طاهر

طبعًا المعروف عن عمر طاهر في كتاباته بشكل عام إنها ساخرة وناقدة أحيانًا للواقع اللي بنعيش فيه، وفي الأغلب كمان بتكون بعيده شوية عن الكتابة الأدبية التقليدية، وبتاخد شكل “فضفضة”.

كتابه المره دي “كتاب المواصلات” عبارة عن تجميعه لطيفة لمقالات مختلفة في المضمون، لكن متشابهة عند (عمر) في إنها بتفكره بذكريات مع مزيكا بيحبها، أو مكان أو شخصية معينة اتأثر بيه.

مقالة “غنوة” مثلًا، عمر بيحكي فيها عن أغنية “زي الهوا” وشاعرها محمد حمزة وملحنها بليغ حمدي.

• مدينة الحوائط اللانهائية – طارق إمام

الكاتب المصري “طارق إمام” بيخترع في روايته مدينة من وحي الخيال، وسماها “مدينة الحوائط” وطبعًا بما إن المدينة متخيلة، فبالتالي الأجواء المحيطة بيها كمان من وحي الخيال، يعني كله خيال × خيال.

يعني مثلًا، شوارعها صغيرة وضيقه ما ينفعش اتنين يمشوا جمب بعض فيها، بيوتها مافيهاش أبواب أو سقف، وبتطل على بحر من “الدموع”.

• سيدة الزمالك – أشرف العشماوي

هو عبارة عن رواية بتدورها أحداثها في سياق بوليسي شوية عن المليونير اليهودي ” شيكوريل” اللي اتقتل في الزمالك على ايد 4 أشخاص منهم السواق بتاعه، وفيه ست مشتركة معاهم وشجعتهم، هنكتشف إيه تاني؟

الكاتب “أشرف العشماوي” هو في الأصل قاضي مصري وروائي، اتنشر ليه 6 روايات لحد النهارده، أشهرهم رواية “تويا” اللي وصلت للقائمة الطويلة لجائزة البوكر سنة 2013، ورواية “البارمان” اللي فازت بجائزة أفضل رواية عربية لسنة 2014 من الهيئة المصرية العامة للكتاب.

• قريبًا من البهجة – أحمد سمير

الجديد عند “أحمد سمير” في روايته اللي تعتبر العمل الروائي الأول ليه، هو وبالرغم من انه بيتكلم في موضوع اتهرس في مية رواية وكتاب قبل كده (وغالبًا ده هيكون الانطباع الأول عنها) ، حوالين اللي حصل قبل وبعد ثورة 25 يناير، إلا أنه قدر ياخودنا في حتت كتير في الرواية بعيدًا عن الكلاشيهات والسطحية اللي معظم الكتب اتكلمت بيها عن الثورة بحلوها ومرها.

• المولودة – نادية كامل

المخرجة المصرية “نادية كامل”، بتحكي في روايتها قصة حياة مامتها “ماري إيلي روزنتال”، المولودة لأب مصري يهودي وأم إيطالية مسيحية، واللي انضمت للتنظيم السري للحركة الشيوعية واتسجنت قبل ما تشتغل صحفية متخصصة في حقوق المرأة.

أسلوب السرد في الرواية دي هيخليك تحس إنك رجعت لسنة 1930 وعايش جوا القاهرة مع الأجانب وفي بيوتهم، لكن ده ما يمنعش إنك ممكن تحس ببعض الملل لإن الرواية طويلة شوية (فوق الـ500 صفحة).

• الخروج من البلاعة – نائل الطوخي

في 500 صفحة تقريبًا بيقدم لنا “نائل” وجبة دسمة من الأحداث والخيوط المترابطة عن”حورية” المعروفة بـ”حرنكش”،  بطلة “الخروج من البلاعة” الأرملة وأم الطفل المصاب بمرض نفسي، واللي بتدخل في تجربة زواج تانية بتنتهي بقتل جوزها لابنها ثم انتحاره، عشان تكمل حياتها وحيدة مكتئبة وسط أحداث ثورة 25 يناير.

• طرق الرب – شادي لويس

الرواية بيتكلم فيها “شادي” عن شاب مصري مسيحي، بيحكي عن دور الكنيسة الكبير في خط سير حياته، واللي بيبان لما بيقرر يتجوز، وكان لازم يطلع شهادة “خلو موانع” اللي بتسمح له بالزواج، وطبعًا ده هيضطره لمواجهة تعقيدات بيروقراطية كنسية، وهيضطر يحضر جلسات اعتراف منتظمة قدام قس في الكنيسة علشان ينظر في أمره.

طبعَا وأكيد في كتب أكتر، وأكيد كمان ليك وجهة نظر ممكن تختلف عن اللي مكتوب هنا، مافيش مشكلة خالص، إحنا حاولنا نجمع الأفضل من وسط كم مهول من الكتب اللي نزلت في 2018 على قد ما قدرنا، وأكيد فيه أكتر وفيه أحلى.

الموضوع الأصلي من هنا.