The Definitive Guide to Living in the Capital , Cairo , Egypt

كل سنة وأنتم طيبين، واحدة من المشاكل اللي بتواجه كتير من الشباب في رمضان هي وقت الفراغ اللي ممكن يضيع في النوم.. علشان كده الكتب هي أفضل حل للاستفادة من أي وقت فراغ في حياتنا بشكل عام، وفي رمضان بشكل خاص. وفي السطور الجاية هنعرفكم على 9 كتب مميزة، ومناسبة جدًا للقراءة في نهار الشهر الكريم، منها كتب حديثة، وكتب تانية صدرت من فترة لكنها لسة محافظة على نسبة مبيعات في مكتبات القاهرة بسبب تميزها.

بعد ما يناموا العيال

عمر طاهر كاتب متميز، عنده لغة بسيطة وسهلة الوصول للقلوب، وفي كتابه الأحدث “بعد ما يناموا العيال”، بنتعرف على مراحل مهمة بتمر بيها النفس البشرية من المراهقة، والحب، والغربة، والوحدة، والزواج، والأصدقاء، والنجاح، والفشل، وهتلاقوا دائمًا طعم ورائحة في كل صفحات الكتاب.

تاكسي (حواديت المشاوير)

كتاب مهم، صدر من كذا سنة للكاتب خالد الخميسي، ووقتها عمل صدى واسع لما نزل الأسواق، واتطبع طبعات كتير، الكتاب بيوصف المجتمع المصري بشكل شيق قوي، حدوتة سواق تاكسي، ويا عينى على اللي بيقابله.

الخيميائي

الخيميائي لباولو كويلهو.. مش مجرد رواية، ومش مجرد رحلة لشاب بيدور على الكنز، الموضوع أكبر من كده، على الرغم من بساطة اللغة والحدوتة، لكن باولو كويلهو عمل في الكتاب ده اللي ما يتعملش.

يوتوبيا

الدكتور أحمد خالد توفيق قادر يفضل متواجد في حياتنا حتى بعد رحيله، من وقت ما قرر يكتب للشباب قصص الرعب والبطل المختلف تمامًا دكتور رفعت إسماعيل، اللي هو دكتور مثقف وبيدخن بشراهة وكبير في السن، لكنه دكتور مختلف، في يوتوبيا بقى حالة تانية خالص هتعيش مع الأغنياء اللي عزلوا نفسهم في الساحل الشمالي وبحماية المارينز، لكنهم لما حاولوا يطلعوا بره اليوتوبيا.

رحلتي مع غاندي

أحمد الشقيري هو إعلامي ناجح، وعنده تجربة نجاح مميزة، وكتاب رحلتي مع غاندي فيه خلاصة تجربة الشقيري في الحياة، هتستمتعوا.

الرباعيات

مش محتاجين نقول لكم أن الشعر زاد الروح، وأن شعر العامية ليه حالة خاصة، ولما يكون الشعر ده طالع من جوه قوي وبسيط وممتع وبيلخص رحلة في الحياة، يبقى ساعتها لازم تفهموا إننا بنتكلم عن عمنا صلاح جاهين اللي لخص تجربته في الحياة في مجموعة رباعيات اشتهرت بين الناس واتغنت واتعمل عليها مسرحيات وأفلام قصيرة ودنيا، لو مقرتش الرباعيات يبقى لازم تعمل كده.

مختارات محمود درويش

محمود درويش عمل دوواين كتير، وهو شاعر له طابع خاص فى كتاباته بالفصحى، مش هتحس أنك بتقرا فصحى، هتحس أنك بتغني معاه، وهتقعد كل شوية تقول ياااه جاب منين الصور والتراكيب دي، الراجل ده عاش بيقرا ويكتب بس.

قالت ضحى

رواية “قالت ضحى” للكاتب بهاء طاهر نشرت لأول مرة سنة 1985، ووقتها استقبلها القراء والنقاد بترحاب شديد، وكانت نقلة حقيقية في مشوار الكاتب الإبداعي بهاء طاهر. لو مقرأتش الرواية يبقى ده الوقت المناسب علشان تحصل عليها.

مثنوي

” مثنوي” لمولانا جلال الدين الرومي.. ماينفعش يعدي رمضان وأنت بتقرأ وماتقراش للصوفية، وماينفعش نقول تصوف، وماتجيش في دماغك مقولات مولانا جلال الدين الرومي، ولما نذكر الرومي يبقى لازم نذكر كتابه (مثنوي) اللي كل الاقتباسات اللي بتتاخد منه وبتقراها على السوشيل ميديا جاية من الكتاب ده، هو كبير صراحة، بس ممكن تبدأ قراية فيه وتعيش مع مولانا في حالة تانية خالص.