عصفورة.. كتب أطفال هتطير بكم لعالم الخيال المدهش!
دار عصفورة قصص للأطفال بالعامية كتب أطفال مكتبات القاهرة
Cairo 360
مصدر الصور: موقع عصفورة
في كايرو 360 بنحب العامية وبنحترمها، وبنشوفها أقرب للغة كاملة مش مجرد لهجة. لما عرفنا إن فيه دار نشر جديدة في القاهرة بتقدم كتب مطبوعة للأطفال بالعامية عجبتنا الفكرة، وقررنا نقرب أكثر منها علشان نعرف التفاصيل. عصفورة هي دار نشر حديثة في القاهرة، مؤسستها أم مصرية بتحب الكتب، وهدفها تقدم للأطفال، خاصة طلاب مدارس اللغات، كتب بالعامية المصرية، تكون سهلة وبسيطة وتخليهم يحبوا اللغة العربية.
تعالوا نطير مع عصفورة لعالم من الخيال المدهش.
مؤسسة الدار هي ميرام خميس، أم مصرية بتوصف نفسها بأنها “دودة كتب بتحب القراءة والأطفال”، وعن البداية بتحكي “ميرام” وبتقول: لما بقيت أم لآدم. أدركت وقتها أهمية وجود كتب عربية بلهجتنا المصرية تعرّف الأطفال على هويتهم وثقافتهم. وأنها تكون كتب بجودة عالية، ورسومات أفضل”.
في تدوينة لها على موقع الدار، بتحكي “ميرام” عن بداية الفكرة: “بعد ما قررت أبدأ “عصفورة”، أخدت فترة علشان أتخطّى سخرية الأصحاب والعيلة. مش معقول.. ميرام! طيب لو على الكتب ده شيء مفهوم.. لكن بالعربي؟!”
وبتكمل: “كان الموضوع مضحك ومخجل في نفس الوقت، أنه للدرجة صعب عليهم يصدقوا أني هأسس دار نشر لكتب الأطفال بالعربي. أنا مصرية ١٠٠٪. أنا عشت كل حياتي في مصر، معنديش مبرر ليه العربي عندي مش بقوة الإنجليزي. بس أنا عشت سنين بتكلم، بفكر، وبتنفس بالإنجليزي”.
وبتضيف “ميرام” أنها قررت متكررش نفس الغلطة في عدم الاهتمام باللغة العربية مع ابنها. “لما بافكر في اللي دفعني بشدة أني أسلك طريق الإنجليزي بس سنين كتيرة، أدركت أن سبب كبير كان عدم التعرض من بدري لكتب أطفال مناسبة. علشان كدا حلفت أني هوفّر قصص للأطفال يتحمسوا ليها ويفهموها. من خلال دا هيقدروا يمارسوا العربي بتاعهم لحد ما القلق والرهبة منه يختفوا”.
وبتعترف “ميرام” بكل صدق: “أنا أسست عصفورة لإني، قبل أي حد، كنت في احتياج لها”.
بتقدم “عصفورة” مجموعة كتب مميزة، مكتوبة بالعامية، وبتتميز برسومات مبهجة، زي كتاب “هنية وفكرتها الذكية” و”كوكا الفروكة” و”بوبو صاحبي” و”إبرة في كوم قش” وقصص أكثر!
تقدروا تتعرف أكثر على دار عصفورة وإصداراتهم من هنا.
مقترح
الحياة في كايرو
شارع الألفي.. باريس في قلب القاهرة
أهم مباني شارع الألفي تاريخ شارع الألفي +3
الحياة في كايرو
