The Definitive Guide to Living in the Capital , Cairo , Egypt

سعيد محمود

السنة الجديدة خلاص بدأت، وفي 2022 حصل حاجات كتير جدًا على كل المستويات، وتقريبًا القاهرة ومصر المحروسة كلها مافيش مجال ما شهدتش فيه أحداث مهمة، أو بلغة عصر السوشيال ميديا “تريندات”، عشان كده إحنا بنرشح لكم 5 كتب لازم تبدأوا بيها 2023، لأنها هتساعدكم على فهم  “تريندات” السنة اللي خلاص بتودعنا، وفي الوقت نفسه هتستمتعوا بقراءة صفحاتها.

 

أنا قادم أيها الضوء

من أكتر أحداث 2022 حزنًا هو وفاة الصحفي الشاب محمد أبو الغيط متأثرًا بمرض السرطان، والملفت في وفاته هو إن نعيه كان فيه حالة من الإجماع من كل الأطراف على أخلاقه وروحه النقية وأثره الطيب في كل اللي تعامل معاهم.

وبعد وفاته بفترة قليلة جدًا أصدرت دار الشروق كتاب “أنا قادم أيها الضوء“، اللي بيحمل مذكراته ويومياته مع المرض وأشياء أخرى ممتعة لمن يقرأ كتابه البديع، واللي هيساعدكم على النظر لحياتكم وتحدياتها بشكل مختلف وأكثر إيجابية.

وده جزء بسيط من اللي كتبه محمد أبو الغيط في كتابه: “عجيبة هي الأقدار وألاعيبها؛ كأنما طُويت حياتي وكُثفت، فمنحتني بسرعة كثيرًا من السعادة والتوفيق، كما انهارت على رأسي بنفس السرعة. كنت مرارًا أصغر صحفي في صحف وقنوات عملت بها، كما أنني الآن أصغر مقيم في جناح الرعاية الخاصة بمرضى السرطان في ذلك المستشفى البريطاني.

عبر ذلك المسار كله، تغيرت داخليًّا وخارجيًّا، حتى إني أُدهشُ اليوم من شكلي في المرآة. تبدلت الكثير من قناعاتي، كما تغيرت من حولي الوجوه والعوالم، لكن ما لم يتغير قط هو بحثي عن ذلك الضوء الذي يشع من الأرواح الطيبة؛ ضوء التعاطف مع الإنسان من حيث كونه إنسانًا قبل أي شيء آخر”.

 

سر الغرفة 207 

“إنت السبب يا جمال.. إنت السبب في كل اللي حصل وكل اللي هيحصل”.. الجملة دي رددها معظم اللي اتفرجوا على مسلسل “الغرفة 207” المأخوذ عن رواية شهيرة للدكتور أحمد خالد توفيق، صدرت عن دار كيان للنشر والتوزيع سنة 2012، وبتحمل اسم “سر الغرفة 207″، والمعروض على شبكة شاهد السعودية، وكان من أبرز “التريندات” الفنية في 2022.

لكن هل أحداث المسلسل هي نفسها أحداث الرواية؟ ده اللي هتعرفوه لما تقرأوها بنفسكم، بس ممكن نحرق لكم جزء صغير ونقول لكم إن الرواية بتدور في فندق برضه وبطلها اسمه جمال الصواف، لكن الشخصية ذات الحواجب المرعبة اللي بتجسدها الفنانة ريهام عبد الغفور مش موجودة في أحداثها.

أحمد زكي 86

مستمرين مع “التريندات” الفنية، وكتاب “أحمد زكي 86” للكاتب الصحفي محمد توفيق، واللي رغم صدوره في 2021، إلا إنه كان “تريند” في 2022 بعد ما قررت أسرة أحمد زكي رفع قضية على مؤلف الكتاب بيتهموه فيها بالإساءة للفنان الراحل.

الكتاب صادر عن دار ريشة للنشر والتوزيع، وبيتناول حياة أحمد زكي في سنة 1986، واللي شهدت حالة توهج فني للنمر الأسود، واتعرض له فيها 6 أفلام، هم “البريء، الحب فوق هضبة الهرم، البداية، الراقصة والطبال، شادر السمك وسعد اليتيم”.

ويبقى السؤال.. هل الكتاب بيسيء لأحمد زكي ولا لأ؟ ده اللي إنت هتعرفه لما تقرأ صفحاته.

 

نظام التفاهة

“الحمد لإله العالمين..كل التافهين.. صعدوا وأنا مغروز في الطين.. لكن مبسوط”.

ده مطلع قصيدة ساخنة من سلسلة “فرقع لوز” اللي كان بيكتبها الشاعر فؤاد قاعود على صفحات مجلة صباح الخير في الثمانينيات، وهنا تحس وكأنه بيتنبأ بالمستقبل وبيتكلم زمن تريندات “انتش واجري” ومحمد كشري” وغيرهم، واللي كتير مننا بيقول لنفسه لما بيشوفها: “إيه التفاهة دي”، والبعض بيؤكد إنه ده مقصود وما هو إلا تنفيذ لخطة ممنهجة هدفها تغييب عقول الناس عن طريق صناعة التفاهة والترويج ليها على كل المستويات.

ده بقى اللي بيتناوله الكاتب الكندي الدكتور آلان دولو في كتابة “نظام التفاهة”، اللي ترجمته الكتابة الكويتية الدكتورة مشاعل عبد العزيز الهاجري، وصدر عن دار سؤال للنشر سنة 2015، لكن ضروري جدا تقرأ محتواه وإنت داخل على سنة 2023.

قوة العادات

إيه هي أول حاجة بتعملها لما تصحى من النوم؟

بتدخل الحمام على طول؟ ولا بتمسك موبايلك تشوف الفيس وبوك وماسنجر واتس اب؟ ولا بتفتح التلاجة وتاكل اللي تشوفه قدامك؟

بتروح شغلك من أي طريق كل يوم؟ طب هل بتاكل أكل صحي ولا لأ؟ ووسط ارتفاع الأسعار اللي بيحصل كل يوم، هل بتقدر تحوش عشان ما تتزنقش؟

كل الحاجات دي وغيرها بتحكمها عاداتنا في الحياة، ولو قدرنا نتحكم في العادات دي ممكن بسهولة نوصل لبر الأمان في كل المجالات، وده اللي اتكلم عنه الكاتب الأمريكي تشارلز دويج في كتابه “قوة العادة.. لماذا نعمل ما نعمل في الحياة الشخصية والعملية؟”، والمصنف وفقا لـ “فاينانشال تايمز” من ضمن أفضل الكتب في 2012.

كتاب مهم جدًا ومفيد وبيعرفك نفسك وإزاي بتتكون عاداتك ولو عايز تغيرها تعمل إيه، وعشان تبدأ السنة الجديدة وإنت مستعد للتغيير الإيجابي في حياتك، هيكون مفيد جدا إنك تقرأ اللي كتبه تشارلز دويج في الكتاب ده.